سينگێ ئه‌ڤرازييا

ئه‌ز و هزرێن بێ هچك
د ئاغله‌ويكا شه‌ڤێ ده‌ فه‌ليته‌ نه‌..
ئه‌ڤرازييه‌ و دل ب مه‌ستى
و ب سه‌ربۆره‌ك پشت شكه‌ستى
دێمێ خوه‌ يێ دخه‌ملينت...
د چاڤێن خوه ‌ده‌
ئه‌ز يێ رِۆندكا دگڤێشم
جه‌رگه‌ك ترسێ
ب ده‌سته‌ك سه‌هه‌ند دكه‌لێشم...
بێ ژڤان و بدويراتييا خه‌ونه‌ك مز
ته‌ ئاوازێن نه‌مه‌ياندى
د گوهێن من ده‌ سه‌ر نشيفكرن....
چوكێن من مينا دوو كڤاركانه‌
و گونه‌هێن ته‌ دبن ده‌
يێن بووينه‌ گومچك..
چ ديمه‌نه‌ك نه‌هه‌ژى
ناڤێ ته‌ يێ پڤداييه‌..
حه‌ز ئێكه‌ و ئه‌ز و تو دووينه‌
له‌و سێكا شه‌ڤێ
ده‌ستێن من موقلاجی نه‌...
بوخچكا من پرِى خه‌مه‌ و
خه‌م هێڤێنێ هۆزان و هه‌لبه‌ستێن منه‌..
و شه‌ڤ يا رِێكا خوه‌ دشه‌قينت
چه‌نگێن تارييێ رِادكێشت
و هه‌ر تو يا سه‌ما سه‌رِمايێ
ل سه‌ر مژيلانكێن من دگێرِى
هه‌رده‌م ته‌ يا گێرِاندى
هه‌تا تيرِۆژكێن سپێدێ
په‌ردا تارييێ درِاندى
من خوه‌ ديت ئه‌ز يێ ب تنێ مه‌
و د دانگا من ده‌
باليفكه‌كى قورمچاندى...!