تو خه‌ونا چه‌ندێ يى...؟!

نێرگز ئيسماعيل

 

باسكێن شكه‌ستى ل به‌ر بێ دهه‌ژين
تيپێن بێريكرنێ ل به‌ر بايێ ئاسۆ دله‌رزين
به‌لگه‌يان، رووكێ ديتنێ شين كرن
ئه‌ڤ ڤۆلكان بێهووده‌يه‌
ل مه‌ كريه‌ په‌ردا خه‌مان
ستێركێن هێڤيدار، ئه‌سيمان وه‌ندا ناكن
مرن، بێده‌نگ دهه‌ركه‌...
و ئه‌ڤ دل ناكه‌ڤه‌ به‌ر هشمه‌نديا وێ
ئێدى بهنا ئاسيمان و بوهارا هێڤيان، كه‌شتيا پێشه‌رۆژا من دگه‌رينه‌
هينا ئه‌ڤ جانه‌...
جانه‌كه‌ ل بنێ ئۆقيانۆسان ل ماسيێ خوه‌ دگه‌ره‌
گيانێ، ئه‌ز فێرى ژيانا ل ناڤ به‌ده‌ويا زنارێن كۆ دكه‌نن، كرمه‌
و گرنژين، ژ ناڤكا چيا دزێ
ئێدى هه‌موو ديمه‌نێن ڤان خربه‌يان...
ده‌ردێن من دكه‌وينن
وها كريه‌، كۆ خوداوه‌ند ژى،
ماتمايى و لال مان
كاتژمێرێن ئاڤێ، سار و گه‌رم دته‌ڤزن
و هه‌ڤركيێن تبلێن ئه‌وارن
پالا خوه‌ ددن بێريكرنێن خه‌مبار
نه‌ما گوه ددم ئه‌فسانه‌يێن ده‌ره‌وين
هه‌ر ده‌نگ، نه‌ما ب كێرى چۆلێن دلێ من تێن
من ب دلۆپێن خوهدانا ئانيا خوه‌، گول شين كرنه‌
ناڤێ وێ، چۆلا قێرينێيه‌
ما بيرهاتن، مرۆڤان ژ بير دكن؟
ئه‌و دارا فێر ببوو ناڤێ تيپێن مه‌، ژ بير ناكه‌...
و دلێ خوداوه‌ندێ هێڤيان بهێله‌...؟
ته‌نێ ئه‌ز و تو تاوانبارن
له‌ورا ئاخ نه‌ كاڤلێن خاڤن
نه‌ كوندێن بێچاڤن
ئه‌ڤ شه‌ڤ، به‌نده‌وارێن چ نه‌...؟!
ئه‌و هه‌ست ژ گه‌رێ قه‌رمينه‌
مينا هه‌ژاريا كه‌زيێن پاييزێ…
دارێن قاچێ هه‌ژار بوونه‌
ژ وێ خه‌ونى...
د وێ رۆمانا نه‌نڤيسى ده‌...
تو خه‌ونا چه‌ندا يى...؟!
تو چاڤێن چه‌ندا يى، كۆ دێ د هه‌ڤديتنا داوى ده‌ خوه‌ بكووژن...؟!
تو يێ چه‌مێ چه‌ندين بى...
بێيى كۆ بهه‌ركى، تو يێ بمچقى...؟!
بارێ پرسا گرانی
د شه‌ڤێن زڤستانێ ده‌...
تينا ئاگر ژى گه‌رم ناكه‌ دێليێن تريان
و خوه‌شك ناكه‌ به‌ژنا چنارێ
ڤايه‌، سه‌كه‌راتێن هناسه‌يێن خوه‌ دژمێرم
ڤايه‌، ڤه‌گه‌رم رۆژێن داوى يێن ژينا خوه‌
سه‌بر و ئاراميا ئه‌يووب ژى وه‌ستيايه‌
و گه‌وريێن چووكان ئاوازان دجوون
ته‌ير و فرنده‌، نه‌ما تێن ديتن
و هێلينێن خوه‌، ناڤ به‌شتێن خانيێن ئاخێ ده‌ نه‌ما چێدكن
وار و شوونوار ب ته‌نێ مانه‌
ته‌نێ سيپه‌لكێن گلۆليكا به‌رفا ره‌ش...
هێێدى... هێێدى دهه‌لن
و ل پاش خوه‌ پشكوژێن ڤينا خوه‌ دهه‌لينن
من ته‌نێ خه‌ونا پێنجێ ژ كراسێ شه‌ڤێ ره‌ هشتيه‌
نزانم، ژ سترانا سازا ته‌ ره‌، ئه‌ز ئێ ئاشووپا چه‌ندان بم...؟!
ژ ئاڤژه‌نيا ئه‌ڤينا ته‌ ره‌، ئه‌ز ئێ زه‌ريا چه‌ندێ بم...؟!
نزانم...
نزانم...