ژ
بووكا حهريێ شهرم نهكن.
هينا ژ بچووكانيا دلێ خوه ڤه، گاڤا ههموو خهون دكهتن گهرا ئازاديێ،
دهما چاڤێن مه سينۆر ناسنهدكرن… نه خهت و خهتخهتۆك، نه ژى ژۆر و
ژێر، نه گوند و باژار، نه سهرخهت و بنخهت… گاڤا تهنێ ل ناڤا بووكێن ژ
ههريێ خهونێن مه دكهنيان، بيرا رۆژێن سار و سهقهم نه دبرن. بووكێن ژ
ههريێ، كهنێ مه گهش دكرن …ته دگۆت بهلكى جيهان تهنێ يا دلێن خوهديێ
هاستێن مهزنه.. لهورا د مهزناهيا چاڤێن مه ده، ئهو بووكێن ههريێ،
وهكى خهونان دمان، خهو كرى ناڤ بيرهاتنێن مه. هنهكان ژ بووكێن خوه
يێن ههريێ شهرم كرن، و هنهكان، ل ناڤ وێ ههريا سۆرى مستاندى، ب تليێن
نازك، ئاغا دلێن خوه، پێ مستاندن.. كرن ههريهك پێ خهونێن خوه يێ ئازاد
خهملاندن. بووكێن ههريێ، وهكى مه، ب ترس بوون، گاڤا پاش سينۆر چاڤێن
مه ل پۆتينێ لاشگهرێ تركان دكهتن. وان پۆتينان دگۆتن: ئهڤ دهر، نه
وارێ ههريا ئازاده. تێل ههنه… مه بنخهت و سهرخهت چێكريه. لێ
بهلێ، دهنگێ كهنێن مه، هينا ئازاد بوو …خهما وێ ئهو بوو كۆ بووكا مه
خهرا نهبه. گاڤا ڤهدگهريام مالێ…بن متێلا خوه، د وێ قونجكا خزانيێ
ده، …بێهنا پاپۆرا دايكا من، چاڤێن من ل سۆلێن مه يێن قهتيايى دخست. ژ
خوه قهتيايى بوون. دايكا من ژى، ب كێرا گهرم، سۆلهكه دى دقهتاند، و
يا دى، پێ پينه دكر… گهلۆ رهنگێ سۆلا من سۆر بوو؟ كهسك بوو؟ گهلۆ زهر
بوو؟... هينا نزانم. لێ ڤێ دزانم، خزانيێ رهنگێن وێ، ژ زارۆكاتيێ ده …
كهسك، سۆر و زهر كربوو. هينا دل بچووك بووم، سۆلێ گۆتبوو: تو كهچهكه
كورد ئي… ژ رهنگێ كهسك و سۆران هاتيه جيهانێ.
ئهرێ سۆلێن مه پينهكرى بوون، لهورا ههستێن مه پينه ناس نهدكرن. ….
ئهو تێلێن بێبهخت، نهدبوون كهلهم، گاڤا ئهم ل ناڤ بهخچێن پيڤازان،
قيرێن مه يێن ئازاد، دلێن بچووك ئێن نسێبينێ و يێن قامشلۆ، دگهان ههڤ.
نه تهنێ قامشلۆ دبوو باژارێ ئهڤينێ … ئهو و نسێبينێ سهمايا ئهڤينێ
دگهراندن. ئێڤار دهات، ههر چاڤێن من، پاش تێلان بوو …سهير بوو. گهر من
تێل ل دلێ خوه يێ بچووك بپێچا … دلێ من ئێ مينا ههسپا كهێل، ههفسار
نهدپهژراند، نه ژى تێلێن رزيايى …
ههر چقاس ئاگرهكى ترسێ د ههستێن مه ده، خوه دكهلاند.. ئاگرێ كۆ
زارۆكان قێرينا خوه گهاندن ههفت قاتێن ئهسمانان، و تو كهسهك نهچوو ب
ههوارا وان ڤه، ئهو ئاگرێ سينهما ئاموودێ بوو…لێ بهلێ ئاگرهكه دن
ههبوو، بێهنا بوهارێ تاني… بێهنا حهزكرن و ئاراميێ تاني. د شهڤهكێ ده،
ب ئاگر ره، باژارێ ئهڤينێ و نسێبينێ دكره يهك … ئهو ژى ئاگرێ نهورۆزێ
بوو. نهورۆز، بووكا مه يا ههريێ دكره راستي.. پێلى ههموو تێلك مێلكان
دكر…
١٩/٣/٢٠٠٨
