کۆمه‌لا کانییا سپی, ناڤه‌ندا ئه‌رشیڤکرنا رۆژنامه‌گه‌رییا کوردی ل هۆله‌ندا، بنگه‌هێ لالش ل ئه‌لمانیا و مالا ئیزدییان پێشوازییا شاندێ ئیکه‌تییا نڤیسه‌رێن کورد – دهۆک، دکن

وێنه‌: ئاڤێستا کورد

ل بێلفیلدا ئه‌لمانی برێز حه‌سه‌ن سلێڤانی سه‌رۆکێ ئێکه‌تییا نڤیسه‌رێن کورد – دهۆک، نڤیسه‌ر خێری بۆزانی، ده‌روێش فه‌رحۆ سه‌رۆکێ ئنستتیۆتا کوردی ل برۆکسه‌لێ، نڤیسه‌ر سه‌لیم بچووک، رۆژنامه‌گه‌ر حه‌سۆ هورمی و سترانبێژ ئه‌کره‌م ره‌شۆ به‌شداری کۆنفراسنێ بوون.

ل ده‌ستپێکێ نڤیسه‌ر سه‌رحان عیسا ب ناڤێ کۆمه‌لا کانییا سپی په‌یڤه‌ک خواند و تێده‌ بخیرهاتنا مێهڤانان کر. پاشی د جڤینێ ده‌، حه‌سه‌ن سلێڤانی ل سه‌ر دیرۆکا ئێکه‌تییا نڤیسه‌رێن کورد – دهۆک و بزاڤ و چالاکییان ئاخڤت. سلێڤانی دیار کر کو د ڤان سالێن دوماهیێ ده‌ وان وه‌کو ئێکه‌تییا نڤیسه‌ران په‌یوه‌ندیێن خورت ل گه‌ل نڤیسه‌رێن کورد ل به‌شێن دی یێن وه‌لاتی چێکرنه‌ و ئه‌و په‌یوه‌ندی بوویه‌ پالده‌ر کو کار و خه‌باتا وان پتر بت. هه‌روه‌سان ل سه‌ر پرۆژه‌یێ چاپکرن و وه‌شانا پرتووکان ئاخڤت و گۆت کو هه‌تا 138 پرتووکان جاپکرنه‌ و 32 پرتووک ژی ئاماده‌ نه‌ ژبۆ جاپێ. هه‌روه‌سان ئاماژه‌ بۆ وێ جه‌ندێ کر کو ده‌ستکه‌ڤتێن باشوورێ کوردستانێ نه‌ ب تنێ بۆ باشوورن به‌لێ بۆ ته‌ڤایا کوردان و هه‌موو کوردستانێ.

نڤیسه‌ر خیری بۆزانی ل سه‌ر وێژه‌یا کوردی و ئاسته‌نگێن وێ ئاخڤت. بۆزانی د ئاخاڤتنا خوه‌ ده‌ بال کێشا سه‌ر ئازادییا نڤیسه‌ران و راده‌ربرینێ، گۆت کو ئازادی ژ مرۆڤی ب خوه‌ ده‌ست پی دکت.

هه‌مان که‌سانێن هێژا ل مالا ئیزدییان ژی ، ل ئۆلدنبێرگێ، ئاماده‌ بوون و جه‌ندێن هزر و پرسپه‌کتیڤ ده‌ربارێ جاند و ئه‌ده‌بیاتا کوردی سه‌رانسه‌ر کوردستانێ راگه‌هاندن.