بهرههم - نڤیسار
ژ ته خهریبم
دایکا دالیایێ ( ههلبهستڤان )
ژ ته خهریبم
ژته خهريبم
ژ دارستانا دلێ ته
خهريبم
ژگرى وگرنژينا ته
خهريبم
ژ كهرب وهوڤاتيا ته
خهريبم
ژستران ودهنگێ عودا ته
خهريبم
دێ كهنگى هێى و
گهمارا خهريبيا من و
خويسارا خوها ئهنيا من
جارهكا دى
ب دهستمالا خو پاقژكهى و
لهشێ گونههبار
كهيه بهرائهت.......
وژته خهريبم
دباژێرهكێ پرى ئهشق
چاڤێن من
ژدووكێلا جگارا ته دتارى نه...
ل وى شهقامێ سهرخهش
ئهوێ شهڤێ
بهژنا وى كريه تارى و
جارهكا دى
دێ پهياسا كهين
ئاها ئهوێ شهڤێ
ته ئهز
دقوتابخانا دلێ خودا
فێرى ئهليف بێتكێن عهشقێ كرم
فێرى حهژێكرنا تاريێ كرم و
ناسناما من
دچاڤێن خو دا كره بادهك و
سينگێ ته بوو وهلاتهكێ گهلهك مهزن
ههمى خهمێن من حهباندن و
ژته خهربيم
ته حهژ پرچا منا زهڤيا گهنمى دكر
ئهڤرو لێ كره پايز و
بولبلا خهما مه داعيرا و
ئاواز ژبيركرن...
وژته خهريبم
دهستێن ته بوونه ستێر
مژيلانكێن من ژخهو راكرن...
لبهر گهرما شهڤا خوههوى
سووتن دهمبێزا شهقامێ رويسى دا
ههبوويهكا بهرزهمه
حهزێن من دبژالهنه و
بيرهاتن دبنه
شانۆگهريهكا تراژيدى و
مێژوويا من هێمن دكهت
بوچيه مێژوو ؟
ئهگهر نهبمه دورهێل
دچاڤين تهدا و
خو ڤهشێرم و
ههمى پهيڤێن جوان
قوربانى بهژنا تهبكهم...و
ژته خهريبم
حهزا من بو
عهشقا مه ببيته داستان
مێژوو د چاڤێن خودا مور بكهت...
وهره دهم يێ كورته
نههێله تاڤيێن بوهارێ
ڤيانا مه زوى بشووتن و
راستيا بكهته خهون
ئهگهر تهبڤێت ل خو نهزڤره!
لێ بزانه
ئهز نه ياساويلكهمه
وهك تو هزر دكهى
كو دێ دناڤ پێلێن عهشقا ته دا
خهندقم
يانژى وهك عهورهكێ بوهارى
زوى بو ته كهمه گرى
تو هزر دكهى
بتنێ چاڤێن ته
پهياما عهشقێ دگههينن
تو يێ كومكانێ
ب پهياما عهشقێ دكهى
تو هزر دكهى؟
بتنێ ئهز دناڤ دهستێن تهدا
دبمه شيشهكێ شكهستى و
بتنێ تو دشێى پرتێن وى لێك بدهى و
ژته خهريبم
ل بيرا من نينه
جارهكێ من پهيڤ
ژلێڤێن ته دزى بن وكربنه شعر...
تو درهوا ل خو دكهى
لمن دكهى
ل خودێ دكهى و
قهسرهكا بێ بنيات
لسهر دلێ من ئاڤا دكهى...
ته چ داڤێن وهفاداريێ
ددلێ من دا نهڤههاندينه و
ج خوين لسهر شههيدبوونا من
ب ههر وهيى ته نهدايه
لێ چ بكهم ؟
و ژته خهريبم...
چاڤێن ته لێف ئاڤن
من بهرڤ سهفهرهكا
بێ دووماهى دبهن
لپشت دهنگێ عهوران
من گوه ل دهنگێ تهدبيت و
ئهز هێلينا عهشقا مه
دبشكوژێن گولان دا چێدكهم...
لێچ بكهم؟
قهدهر يا بوويه ئبليس
لسهر دلێ من سهمايێ دكهت
و ژ تهخهريبم
من دهستێن خو درێژكرنه
تيروژكێن روژێ دابگرم
لێ ئهز ب ههمى ڤه سووتم
من خوهاڤێته پێلێن دهرياى
ته دهستێ خو بومن درێژ نهكر و
ئهز خهندقيم... و ژته خهريبم
من مێژوويا خو
بگرى ڤه دانا بهر سينگێ ته
ته چ لێ كر؟؟
ئهز روحهكم وهكى ههمى روحا
جار گونههبار و
جار دلوڤان و
جار خودا وهند و
جار ژى زاروك و
ته ئهز بێ دداگههـ
دعهشقا خودا
سێدارهدام؟
لێ چ بكهم ؟ ژته خهريبم
پهيڤێن شعرا من
دكنارێن چاڤێت ته دا
بوونه برين... و
ژته خهريبم
دنههشيێ دا
دهشياريێ دا
ئاخينكا رادهێلم
بو ئهوان گاڤێن من وته
لسهر شهقامێ درێژ
خو دتوفانا عهشقێ وهردكر
ئهم بووينه لێمشت و
ب جادێ دا... هێدى هێدى
هاتينه خوارێ
لێ چ بكهم تو يێ ياخى و
ژته خهريبم
ئهڤێ جارێ دێ نامهكا
ئێتيم بو ته هنێرم
ئهڤ نامه دبێژيت
ئێدى ئهز
بو ته روندكا نارێژم
نهژى گولا لسهر سينگێ ته دچينم
تو يێ ژپراسيا
تترو مهجوسا فێرى عهشقێ بووى...
من وته ژدهسپێكێ شهره
تو ئهژدههاك بووى دعهشقا مه دا و
ئهز رسته گولێن بوهارى بووم و
خو لبهر گوهرينا روژێ ناگريت و
ئه ز بوومه قوربانيهكا دى
دئهلبوما عهشقا تهدا و
ئهڤجا ههره
بهسه ڤيان و
بهسه خهريبى وگرى
لێ هيڤى دكهم
ببه بابهليسك و خهريبيا من
بلند بلند ل گهل خو ببه!
پرتووک
ژ
ته خهریبم