نه‌فیسا ئیسماعیل حاجی ( نڤیسه‌ر )

شێوه‌کار:

باوه‌ر ناكت كو ل دۆماهيێ ئه‌و كارێ ئه‌ڤه‌ حه‌فت ساله‌ هزرا وى داگيركرى ب دۆماهى ئينا, گه‌له‌ك پێ دخورى كو ئه‌وا وى كرى كه‌سێ نه‌ كريه‌ و ناكت, ژيانا خوه‌ هه‌موو بۆ ته‌رخانكربوو, جيهانا وى هه‌موو ئه‌و بوو و ژ بۆ وى ئاڤاكربوو , ڤێ شه‌ڤێ كه‌ڤال ب دۆماهى ئينا, هه‌ست كر داڤنشييه‌ و دێ كه‌ڤالێ وى وه‌كو يێ مۆناليزايێ وى نه‌مر هێلت, گه‌له‌ك هه‌ست يێن ژ هه‌موو ره‌نگان د سينگێ ويدا دلڤلڤين و گه‌له‌ك خه‌يال دنژنين, پشتى كه‌ڤال ب دۆماهى ئيناى, بۆ ماوه‌يه‌كى درێژ ل به‌رامبه‌ر راوه‌ستيا و باش تێ فوكرى , ژ كه‌يفاندا نه‌ دڤيا به‌رێ خوه‌ ژێ ڤه‌گوهێزت , جيهانا خوه‌ د كه‌ڤاليدا وێنه‌ كريه‌, نزانت بۆچى پشتى ب دۆماهى ئيناى ترسه‌ك نهێنى د ناڤ كه‌يفا ويدا خوه‌ دهلاڤێژت, كه‌ڤال ژ دوو وێنه‌يان پێكدهێت, ئاليێ راستێ, وێنێ سرۆشتييه‌ ده‌مێ بۆ ماوه‌يه‌كى درێژ ئاسمانى رۆندكێن خوه‌ يێن هشك لێ باراندين, ب سپيياتيێ داگيركرى, چو تشت لێ ديار ناكت, ب تنێ وێنێ سه‌يه‌كى ديار دكت, ئه‌و ژى ژ چاڤێن وى يێن ره‌ش دياره‌, كو ل نێزيك سه‌رێ خودانێ خوه‌يه‌ و خوه‌ مه‌لسانييه‌ و ب ئه‌زمانێ خوه‌ سه‌رێ وى ڤه‌دمالت, ئاليێ دى يێ كه‌ڤالى سۆراتييا ئاگرێ هه‌ل خوه‌ ب سه‌رداگرتييه‌ و ژ گورگه‌كى هه‌ڤالێ خوه‌ يێ كه‌تى پشت خوه‌ڤه‌ هێلايه‌, تخووب د ناڤبه‌را هه‌ردوو وێنه‌ياندا نينن, به‌لكو هه‌ردوو وێنه‌ دناڤ چارچووڤه‌يه‌كێ زێريندا هاتينه‌ دۆرپێچكرن.
شێوه‌كار ل به‌ر كه‌ڤالى ب ده‌ستێن خوه‌ يێن بۆياغگرتيڤه‌ راوه‌ستيايه‌, چارچووڤێ كه‌ڤالى ل به‌ر چاڤان د له‌رزت و تيك د كه‌ڤنێ و ترس خوه‌ ل دلێ وى ددت, به‌لێ د چركه‌يه‌كێدا ئاگر به‌رز دبت و به‌ر ب ئاليێ راستێ يێ كه‌ڤاليڤه‌ دچت, رۆندكێن هشكێن ئاسمانى ئه‌وێن سرۆشت سپى كرى هێدى هێدى د بنه‌ رۆندكێن هه‌لياى و ئه‌ردێ ئۆده‌يا شێوه‌كارى شل دكت و دناڤ بۆياغا وى وه‌ر دبت, "سه‌" خودانێ خوه‌ ب كێلبێن خوه‌ دكێشت و گورگ خوه‌ ژ ناڤ ئاگرى د هاڤێژت, به‌لێ هه‌ڤالێ وى دبته‌ سۆته‌مه‌نى و ئاگر پێ خوه‌ش دبت, هێدى هێدى كه‌ڤال د هه‌لت و ل بنێ ئۆده‌يا شێوه‌كارى كه‌ڤاله‌كێ دورِنده‌ ژ ئاگرى و ره‌نگان و خوينێ و گۆشتى د هێته‌ وێنه‌كرن و شێوه‌كار ژى دبته‌ پارچه‌يه‌ك ژ وى كه‌ڤالى.