بلند مه‌حه‌مه‌د ( هه‌لبه‌ستڤان )

ده‌مێ په‌يڤ ده‌ربازى دلان دبن
ده‌مێ وێنه‌ هلبازى چاڤان دبن
ده‌مێ خه‌م گلوازى ملان دبن
ده‌مێ هه‌موو تشت تو بى و تو ژى پايزه‌كا به‌لك وه‌رين
دئارشيڤێ دله‌كێ زيندانى و ئه‌فسانه‌يا ئه‌لنده‌كێده‌
چيايێن سۆتى و
كومرێن ئه‌شقه‌كا هلێڤرى
به‌لالووكێن تۆزگرتى و
غه‌ريبييێن سينگێ من كه‌لووتين
ل هه‌مبه‌ر راستييا سۆزه‌كێ
دێمجانه‌ بن، چ بكم ئه‌ز؟

مه‌ستبوونا په‌يڤان
په‌نگييانا هه‌ستێن هاره‌
شه‌رمبوونا په‌يڤان
بێ ده‌نگييا په‌ستێن ژاره‌

دنه‌خشه‌يێ وه‌لاته‌كێ بێ نه‌خشه‌ ده‌
ده‌مێ رووبار دشلقن
ده‌مێ كانى دبلقن
ده‌مێ هه‌لبه‌سته‌كا ياخى دبته‌ تو
ده‌مێ چيرۆكه‌كا هاڤى دبته‌ تو
ده‌مێ بێدارى دشه‌ڤێن گران ده‌ دبته‌ حه‌سره‌ت
ده‌مێ هزر بلح دبن و ب ئه‌شقا ته‌ گاور دبم
ده‌مێ راستگۆيێ زه‌نديق ژێ په‌يدا ببن و گونه‌هبار ببم
ده‌مێ پاشگه‌زى دبته‌ شه‌رم و فهێتى و شكه‌ستنێ دگيانێ من ده‌ نه‌بينى
ده‌مێ پريشكێن ئه‌شقاته‌ ب سه‌ر من ده‌ دهێن و چاڤان نه‌ هلينى
ده‌مێ ژ هه‌لچوونێن ئه‌شقه‌كا نه‌بووى زڤێرى ته‌ بره‌ڤينت
ده‌مێ چيچه‌كێن بوونا په‌سته‌كا دى من لال بكت
ده‌مێ دپه‌نچه‌ره‌يێن خوناڤگرتى ده‌ بێ ده‌نگ ببين
ده‌مێ سپێده‌هى زوو نه‌ هێن
ده‌مێ شه‌ڤ مه‌ ب دا گێرت
ده‌مێ خلوه‌تگه‌هێن ئه‌ڤينداران ببنه‌ دۆژه‌ه
ده‌مێ سۆز دهێته‌ سێداره‌دان و سينگ دبنه‌ گورستان
ده‌مێ ئه‌م نه‌شيێن نڤێژه‌كا ئه‌شقێ بۆ خوه‌ بكن
ده‌مێ خوشى باردكن و هه‌پاره‌ دئافرن
ده‌مێ هه‌موو تشت تو بى و تو ژى پايزه‌كا به‌لك وه‌رين
له‌و ل ژڤانگه‌هێن تنێيێ
دێمجانه‌مه‌، ما چ بكم ئه‌ز؟