|
پێغهمبهرێ ئهڤینێ
خوهزی ژ دارا خوهزیان ره
ژ میرێ مرادان ره
من تو بدیتا خهملاندی
وهك بووك
دێ بلا ئهڤ رۆژێن مهیێن ژ تهمهن
خهملا بووكانیا ته بان
ھن ب ھن
خوهزییا خوه ددم ھهڤ
د كلدانكا ته یا زێرین ده
دبه ببه
كو ئهو خوازی پیرۆز ببن
ب رازانا وان ناڤبهرا
مژگوولك و مژگوولكان ده
د كهنێ ته یێ ژ دزیڤه ده
یێ بێدهنگ
من ئهندامێن ترسێ
و لهشكهرێن شهرمێ
بدان گرتن
ب پیالێن مهیا زوھا
یا من ئاڤژهنین د بن وێ ده دكر
دهما ھێلما وێ
و بێھنا ته یا نێرگزیانه
سینۆرێن مانا من
یا دۆرپێچكری
د ڤێ تهنھاییێ ده د ھهلوشینه
دلۆپێن خوێدانا ته یا زوھا
د دهریا ڤی قهرقۆدهیێ زندی ده
پێل و مھانێن ڤێ بهخترهشیێ
ب جھ تینه
وهك ستێرهك ڤهژیایی
ژ ئهسمانێن ھهفتان رژیایی
و د وێ كێلیكێ ب خوه ده
زهماواندا میرێ مرادان بینه جھ
و مه تهڤان ب دهنگێ خوهیێ پووچ و داگێركری د گۆت
ئهڤ چی یه ئهڤ چی یه …؟
چاوا دێ بهخترهشی
ژ میرێ مرادان ره بت
ما خوه نه بھیستی دكر
كو میرێ مرادان
مرادێ خوه دایه مه
و مایه بێ مراد
تا ب مرادێ میرێ مرادان
ما چ تشت ب جھ نه ئانی
ئهم مابوون بهھتی
ب چیرۆكێن شهڤستانان
ل بهر تفكێن كوچكان
و خاچكری
بهر دهرگهھێن گهنهرالان
لاڤلاڤا هنهك ئازادی دكن
ژ دارێن دكتاتۆریا وان
دێ ئهزێ چاوا دهربازیا زنگێنیا
زهنگلێ گاڤێن ته ببم
كو پاش ھهر شوونگاڤێكی ده
نێرگزك شین ببه
یهك چیك به
ژ زایینا قهدهغهكری ره
یهك تیپ بن ژ خوینرێژا
خامهیا گونهھكار ره
خامهیا بێگونهھ
ئهوه ئاھنگا پێغهمبهرێ شینان
ئهوه مرادێ مایی
ژ لھهڤكهتنا لێڤ و لێڤێ
یان ھهركاندنا دلوپێن خوێدانێ
سهر مهمكان و سینگێ
من شهوتاند شوونشۆپێن ته
چهند خلماش مام
ل بهر شووشا مایی
وی چ كێلیكێ ڤالا ببه
ژ بۆ ته د ئێشا خوه ده ببۆرینم
وهكی خهنجهرێ د برینێ ده دبۆرت
ئهوه تنێ مهستیا ھشیارییێ
كو جهند ئێش و ئاراندن بت
ھێلما سهدهمێن مهستیێ
لێ دێ من دۆرپێچ بھێلن
د كلدانكا ته ده
و نه ھێلن
ئهز ژ بووكانیا ته دهرباز ببم
تا كو ببۆرم تهوافا
رشبوونا رهشاتیێ
دبه كۆ ئهز خوه برژینم
سهر خالا گهردهنێ
وهك رستهك ژ ستێران ل دۆر ھهیڤهك
ڤهژین خوه دیار دكه
و ئهم ھاتن
مه تو ل شوون خوه ده ھێلایی
رێیا نهھاتنێ یه
زاڤایه
چهلهبی لێ بێژن
لیلانا تلیلیان بلند كن
تلیان خنێ بكن
بلیلینن
بلیلینن
بلیلینن
نه ئهم ژ دهربهستان ره ژی
د لیلینن
بسترینن ل سهر وی واری
لێ واره مه بوو
ئێ مه سترانێن دهلالێ دلا
تێ ده دستراند
وارێ مه بوو
بوویه كاڤل و بیرانین
لێ ئهم تو ل دو خوه ھێلایی
بووكا بێ خهمل و زاڤا
بێ زهماوهند
بێ سترانن دهلالێ دلا
و لسهر جهلدان مه تو كری
بازرگانێ
ئۆدێن سۆر ھۆتێلێن ئهرزان
مه پڕ تشتێن خوه فرۆتن
یان مه ھهموو تشتێن خوه فرۆتن
رهكهھێن وه مه ژ خوه ره كرن
نیشانێن تهكووشهریێ
وێنهیێن بهرخوهدانێ
و بێ بووھا ب جهلدان ڤه
مهھانهیێ ب كراسێن زانهستی
مه د ھووناندن
كو جهندی دلێ مه
مێژیێ مه قهوقهلی بوو
ئهم مابوون
ب رازانا نه رازانا خوه ڤه
و تێگھێن مه خهسپال بوون
ناڤێن خوه مه كر باڤێ چیا
و چ جاران ئهم ب چیا ڤه
نه ھلكێشیا بوون
ناڤێن قهلهو مه ژ خوه ره
ھلبژارتن
دا كۆ ئهم كێماسیێن خوه
یێن رۆژھهلاتی داگرن
ب تیپ و ناڤان
ما ناڤێن خوه كرن
باڤێ
مهیدان و دیلان
برووسك و چرووسك
گۆڤهند
و یهك جارێ سهما گهلێری مه نه كر بوو
ئهم ھشكبوویی بوون
ژ ترسا رهورهوكا خهونێن ڤی دهمی
برینێن وه ھاتن دزین
كێ ژ مه ھات ھنهك
ژ ڤان برینان گهمار كر
سهر ماسایان ڤالاكرن
ئێشا رهشبوونا
رۆژ و رۆژێن وه بهرهاڤتی كرن
ئۆل
ئێش
رامان
ھێ…. ھێێێێێێێێێ
بازرگانیێ
ب نانێ رۆژانه و نشتیمان
لسهر ماسهیێن
ئۆدێن تایبهت
ئۆدێن نووژهن
ب ناڤێ وهلات و ئیدۆلۆجیان
ھهر چاڤێن ته ل رێیا مه بوو
چاڤێن ته قورمین لسهر رێیا مه
چاڤێن ته بوون شهڤستانێ خوین بارانێ
لسهر ڤێ رێیێ
و دهڤێ ته نه گهریا
كۆ تو نفرینان بكی
و ھهر تو ل بهندی مه بوو
كهس ژ مه نه ھات
كهس ژ مه نهھات
ب ئهشكهره ژ ته ره ببێژم
كو چ كهس نایێن سهر پهرهسوویێن خوه
ئهشكهره و راستیێ ببێژه
ئهگهر سهرۆك و سهركردهیێن من
بهنیشت بن
ب دانیشگھێ سهرۆكاتیێ ڤه
و كوژیار و دهكتاتۆربن
وهك داگیركر
ئهگهر نڤیسكارێن من
ئهو به
ب یهك گۆتارێ ھهستێن ملهت
سهرژێ بكه
سهر سهفرهك زێرین پێشكێشی
داگیركر بكه
و ب زمانی وی
نه ئهڤێن رهخنێن ئازاد
ژ بۆ ھاڤینگھێ ل وهلات
ئهگهر ئۆلمهندێن من
كوشتنا من حهلال بكه
بلند بوونا ھهستێن نهتهوی
ل با جوانێن من
كێشانا ھهشیشه
د ترێنگهھێ ئهورۆبا ده به
ده پیرۆز كن گانێن مۆدهرێن
ب ھێزێن جهوساندنا مه ره
نه گیایێن حهوشێ تهھله
كۆ مافێن ژنا كورد
دابهشكرنا مالێ به
نه مێرێن كورد دهڤبهرادیی نه
ئهگهر سهركهفتنا پارتیزانهكی من
پێشتی بیست سالان
ژ گۆریان
رێیا زارۆكێن وی پارتیێ به
ئهگهر
ئهگهر
ئهگهر
ھشمهندیا مه
ئهڤ قادا گهنی به
كهس
كهس
كهس
ژ مه نایێ
ژ لهوره مه
گۆتنێن فهلسهفا رژی
ژ ته ره دنڤیساندن
جاپ دكرن
بهلاڤ دكرن
ئهم ئهڤیندارن
بلا بمینه وسا
نه ئهڤین بهردهوام دكه
دهما داوی نابه
ب شیكرنێ
ئهڤ نمونێین ژ دیرۆكێ نه
بهردهوامیا ئهڤینا
مهم و زین
خهجێ و سیامهند
و ژ بلی وان
دا كۆ ئهم خوه
و یێن ل دۆرا خوه
و بووكا بێ خهمل
بگھینن درستبوونا
نه درستیا خوه
مژهك ژ ریالستێ مه ل دۆرا
ترسا خوه پێچا
تا قهحبوونێ وهكی بازارا پێزهڤهنگیێ
دێ ئهزێ چاوا؟؟
ته فهری ئهڤینا پیرۆز بكم
و دامارێن ته ژ سهرگویێن
سهرۆكێن ته خوهفرۆش
تهمیز بكم
دۆزا سهرۆكێن مڵهتان
ئازادیا مڵهتێ وایه
و دۆزا سهرۆكێن ته
دانیشگھ و سالاریا پووج به
دا بلا ئۆمیدێن من و ته
قوتیا بویاخا پێلاڤێن
وان سهرۆكان به
كۆ یهك جارێ كوور و دوور
و رهشبوون نه دیتنه
زار و ئازار نه دیتنه
جارهكی تهنێ
پێلێن پێلێن ئێشكهنجێ
د دامارێن وا ره
دهرباس نه بوویه
لێ پرتووكێن رهكهھێن كهوان
ژ خوه ره دزی نه
رهنگێ ئێشێ و قهبقهبا مه
دهستێن خوه ل سهر دانی نه
كهو بوونا كهوان وندا كرن
نێرگزیا نێرگزا خوه
یا خوه
كهچكانیا وێ فرۆتن
سهر جهلدان
ل بهر چاڤێن مه
بن ناڤێن مافان
ب ناڤێن كوردهواریهك دهرهوین
مال و مهودان دان ھهڤ
كهو..
رهكهھ..
نێرگز..
و تیپێن ناڤێ ته..
خهملا بووكانیا ته..
كرن وێنه ب دیواران ڤه
و دهڤێ ته نه گهریا
ژ بلێ ڤان گۆتنان
نه مال و مهودانێ ژیانێ
نابێ شوونا رامووسانا ته
ما ئهز ئێ چ بكم
ژ میراتێ شاھ سلێمان
ئهگهر تو نهوی خوازگینیێن من
| 
