ب گول و گۆله‌يان

ئه‌مێ سه‌رێ خه‌ونێن خوه‌
يێن ئێشدار،
د كه‌له‌گه‌رما به‌فربارينێ ده‌
د كێليكێن شيقينێ ده‌
د باهۆزێن بێده‌نگيێ ده‌
به‌ردن

ده‌ما كۆ ئه‌له‌ندا چاڤ ل خه‌و
نمێژێ د ناڤ ده‌ستێن مه‌ ده‌ دكه‌

ب ده‌ستانێن له‌هه‌نگيێ
ب بێهنا بريێن ئانده‌كۆيان
ب خوينا ليلوزێن بوهارا زوو هاتى
چاڤێن چيان كل بكن
ب گول و گۆله‌يان
ب گرژنين و سترانان
ب سروود و ئاله‌يان
به‌ژنا خوه‌نان ب خه‌ملينن
دا كۆ ديرۆك مه‌ ب شه‌رمى پێشكێش نه‌كه‌

ژ چاڤێن زارۆكێن مه‌ ره‌
ژ خوه‌زيێن دايكان ره‌
ژ قه‌بقه‌با كه‌وان ره‌
و نێرگزيا نێرگزێ ره‌
ديوارێن بێده‌نگيێ د گيانێ مه‌ ده‌
يێن سۆژاندى بهه‌رفينن
دا كۆ شێخ سه‌عيد د ئه‌سرا دارته‌نك ده‌ پێياسه‌يێ بكه‌
د جه‌لده‌يێن دێرسمێ ده‌
دا كۆ قازى مه‌هه‌مه‌د قوراانێ خه‌تم بكه‌
دا كۆ مسته‌فا به‌رزانى هه‌فسارێن هه‌سپێ خوه‌
ب ده‌ستێن مه‌ بگهينێ
دا كۆ مه‌عشووق خه‌زنه‌وى ژ هه‌مبێزێ مه‌ نه‌رڤينێ
ديوارێن بێده‌نگيێ د گيانێ مه‌ ده‌
يێن سۆژاندى بهه‌رفينن