بهرههم - نڤیسار
سهبری سلێڤانی : رۆماننڤیس
هندهک ژ ته و هندهک ژ من ( 1 ) ئهو فێرسێ یاخی، ب جلێن رهش د مژ و مۆرانا ته ده ( ئهزهک) بوو، ژ غهزۆ و فتوحاتان رهڤیابوو، روما خوه هاڤێت، خهنجهرا کو چو جار ژ کالانێ دهرنهخستی شکاند، نهوقا مههینا شینبۆز یا کو چو جار مهخهل نههاتی رامویساند، زین و مهعرکێن وێ بۆ پێژنا فیرسهک دیل پشتی ئازادبوونێ هلگرتن، لغاڤا وێ سست کر ئهڤجار بهر ب تاڤسۆرکا ئێڤارێ هاژووت. ( 2 ) گاڤا کو ئهز ساکۆیێ ژ رهنگێ پۆرا ته ل بهر دکم، ته وهک دارهکه بێ بهلگ دبینم گاڤا کو ئهز پرتووکهک دی دنڤیسم، ته دخوینم گاڤا کو ئهز قههوهیهک دی ڤهدخوم، ته دئالیسم گاڤا کو ئهز جگارهیهک (وینستون) هلدکم، ته بێهن دکم گاڤا کو ئهز خهونێ دبینم، ته هندا دکم گاڤا کو ئهز ته دبینم، خهونێ هندا دکم گاڤا کو ئهز دبم تو، تو دبی ئهز گاڤا کو ئهز ب ئاقل دبم، تو دین دبی گاڤا کو ئهز دین دبم، تو ب ئاقل دبی گاڤا کو ئهز دهێم، تو دچی گاڤا کو ئهز دچم، تو دهێی گاڤا کو ئهز دبم ههمی، تو دبی چو نه گاڤا کو ئهز دبم چو نه، تو دبی ههمی بهلێ، گاڤا کو ئهز دبم زهلام تو دبی ژن و گاڤا کو تو دبی ژن، ب تنێ هینگێ، کهیفا من دهێت ئهز زهلامم. ( 3 ) بهری بمرم: جار دبووم بازهک و ل هنداڤ کهلهخێ ته دفریم جار دبووم پهروانهیهک و ل دۆر رۆنییا رویێ ته دزڤریم جار دبووم زاڤایهک شهرمین و دبشکوریم جار ل بن سیها ته، دبووم زارۆکهک ساڤا و بێدهنگ جار دبووم مارهک و خوه ل نهوقا ته دئالاند بهلێ ههر جار، تو دبوویه پیرتهڤنکهک. ( 4 ) سهرێ سالێ هات و ئهز ژی هاتم نزانم چ بۆ ته بکم دیاری! ئهز ژ گولێن عاشقان و یاریکێن زارۆکان حهز دکم، بهلێ ژنێن وهلاتێ من ژ زێر و زیڤی حهز دکن ههمی دهمان ژن به... ژن بهلێ ل سهرێ سالێ، ببه عاشقهک یان زارۆکهک. ( 5 ) ئهز دزانم، عشقا مه مهزن بوویه خهریبییا مه مهزن بوویه خهونا مه مهزن بوویه ب تنێ چونکی ئهم بچویک بوون، بچویک... بچویک ژ نوی فێری مێتن و ئالیستنێ دبن. ( 6 ) ... و هێژ تو دبێژی: "بێ من نهمره!" بهلێ، ههگهر ئهز دیسان مرم، تکا دکم تو مرارییان ل سهر بهراڤێن خوه نهتهیسینه، دایێ مهنال ل بهر سهرێ من نهسترینه، نهنالینه. دهمێ کو من دبن گۆرستانێ، کهزیێن خوه نه قوسینه، بهلێ ڤههوینه و ل بهر بایێ بێهنا بهدهنێ بفرینه، مۆمێن میهرهدارییێ ل هنداڤی کێلا سهرێ من هل نهکه نهبێژه ئهز پهشێمانم، سیلاڤێن پۆرا خوه ب سهر بنارێن بهژنا بلند ده نهههرکینه. بهلێ ل ههر پێنجشهمبێ، ل ئێڤارا ئهینییێ قهسیدهیهکێ بنڤیسه و بخوینه، شێریناهییان ل وان زارۆکێن بێ ناسنامه بهلاڤ بکه و گونهها مه یا مهزن بغهفرینه... عشقا مه گونهها ههری مهزن بوو د وهلاتێ مرنێ ده، عشقا مه تهک راستی بوو د دیرۆکا جیهادێ ده، عشقا مه سهرمهدی بوو د سهردهمێ سهربهردایی ده. بهلێ ههگهر پێژنا من هات، هینگێ شێخێ سهنعانی ڤهخوینه و بلا داستانا من و ته بنڤیست، دهروێشێ سهمادار ژی ڤهخوینه و بلا ب دهفا خوه ئاوازا زندیبوونا من بژهنت و زارۆکێن سێوی فێری سترانا زندیبوونا من بکت. ئهز ژ وهلاتێ شێخێ سهنعانم ئهز ژ وهلاتێ دهروێشێ سهمیانم ئهو شێخه شێخێ منه، ئهو دهروێش دهروێشێ منه، ئهو وهلات وهلاتێ منه. وهلات: تژی ئاخه... تژی کرمن... تژی شههیدن... تژی ئهزم. ئاخ: تژی وهلاته... تژی کرمن... تژی شههیدن... تژی ئهزم. شههید: تژی وهلاته... تژی کرمن... تژی ئاخه... تژی ئهزم. ئهز: تژی وهلاتم... تژی کرمم، تژی ئاخم. و ههمی پێکڤه تژی ژ ته. بلا باوهردارێن کو جارهکێ ب تنێ ژی گومان د خوه ده نهکرین، ئایهتێن پرتووکێن خوه یێن پیرۆز بخوینن و پرتووکێن من بقهتینن، یان بسۆژینن، مادهم کو خهلهت دخوینن. بلا گومانێن من د ههبوون و نهبوونا خوه ده ل بێدهرا بێ گێره، بهربا بکن. بلا ل دۆر کێلا سهرێ من برهقسن و حێج ببن. ئهز ژ پرسیارێن مونکهر و نهکیران ناترسم... بهلێ نزانم چاوان بهرسڤ بدم ههگهر هات و پرسیار کرن، کا چما من ژ ته حهز کر؟! کا چما ته ژ من حهز کر؟! وان داڤێن سپی ژ پۆرا خوه بکه سیمێ توربهیا من: دا بزانن مهریدێ تهریقهتا عشقا ته بووم ئهز شهڤیارێ شهڤستانا سپی خهونا ته بووم ئهز موسافرێ دهمسالێ پێنجهمین رێکا ته بووم ئهز پایتهختێ بێری و بهندهمانا ههسرهتێن ته بووم ئهز ستێرکا گهشا حهفتهمین ئاسمانێ ته بووم ئهز مرۆڤهکێ سپی ل سهر کۆپیتکا عهرهفاتا ته بووم ئهز قیبلهنامهیا چۆلستانا مێیاتی و گڕێ ئهڤینبازییا ته بووم ئهز عاشق و مهعشوقێ بێهنا بهدهنا ته بووم ئهز گازییا گومانا گهردهنا گهردوونا ته بووم ئهز بهرسڤا بێرییا بهندهمانا باوهشێ ته بووم ئهز ژڤانێ ژانا ژهنینا ژیانا ته بووم ئهز کهسهرا کهدهرا کهوسهرا ئهسمهردێمی ته بووم ئهز باگهرا بهراڤێن بزاڤا بهژن و بالا ته بووم ئهز سحرا سهرابا سحارا سهربهردانا ته بووم ئهز رێڤنگێ رێکا رهڤینا راڤا ته بووم ئهز شههیدێ شاهدێ شههوهتا شهها ته بووم ئهز دلدار و دهلیل و دلێ بێ دلییا ته بووم ئهز کار وکێفهراتا گونهها کهربا ته بووم ئهز بار و بهراتا بهردانا بهرائهتا ته بووم ئهز گل و گازنده و گازییا گۆمانا گیانێ ته بووم ئهز گول و کولیلک و کهل و کهلها سینگێ ته بووم ئهز ئێش و ئازار و ئاگرێ ئارژهنا ئارهانا ته بووم ئهز دیل و دهرد و دهرمانێ دهمارا دلێ ته بووم ئهز میهر و مههدهرڤان و مراد و مهرهقا ته بووم ئهز نهژاد و نژدهڤانێ نژینا نزا ته بووم ئهز لاڤ و لهیلان و لۆرینا لهیلا ته بووم ئهز دهنگێ بێدهنگییا دهنگڤهدانا دهنگێ ته بووم ئهز خهون و خرمان و خهما خهلوهتگهها ته بووم ئهز سرێ سهمایا سهرێ سیمایێن ته بووم ئهز مهی و مههن و مهوالا مهیلا مهمکێن ته بووم ئهز عتر و عهقیق و عیلاجێ علهتا ته بووم ئهز ئیلاهـ و ئیلهام و ئیلا ماشائا شیننامهیا ته بووم ئهز قوربانێ قودرهتا قهرارا قهتلێ ته بووم ئهز.
پرتووک
