شه‌مال  ئاکره‌یی ( هه‌لبه‌ستڤان )

ده‌هـ پۆسته‌ر

ستێر
ستێره‌ك...
ژ باتى برێژيـت ،
گه‌شتر لێ هات!

چاڤ
دوو چاڤ
نڤستن...
دا نه‌نڤن!

ناڤ
ناڤه‌ك كه‌ڤت،
لێ ناڤه‌ك بلند بوو... و
بوو ئه‌لند!

سه‌مفونيیا بێده‌نگيیێ
ب هزرا...
سه‌مفونيیا بێده‌نگییێ...
لێ ددا،
خه‌لكێ،
گوهێن خوه‌ دگرتن!

سيتافك
سيتافكا وى...
مه‌زن دبوو
بچويك دبوو
بچويك دبوو،
مه‌زن دبوو
لێ وى...
هه‌ر هاى ژێ نه‌بوو!

ئه‌لهۆ
ئه‌لهۆيه‌ك فرِى،
مار ره‌ڤيان!

سكر
ده‌نگه‌ك هات،
سكره‌كێ په‌نگیایی په‌قاند!

ئه‌زمان
ئه‌زمانه‌كێ پرِبێژ،
مان گرت،
ئاخڤتنێ...
پاداشته‌ك رێزگرتن وه‌رگرت!

باژێرێ ره‌ش
رۆژ هه‌لات...
ته‌ڤ په‌ردێن شه‌ڤاره‌ش
هاتن سۆتن.
ل ئێڤارى
شه‌ڤێ په‌رده‌يێن نوى...
ژ باژێرێ ره‌ش كرِين!

هزرا به‌رين
ل چاخێ به‌رى،
هزرا به‌رين
هێرا ب به‌رى،
گه‌هشت ڤى به‌رى.
ل ڤى به‌رى...
هزرا به‌رين
ئه‌ڤاند مينا
خوداڤه‌ندێن ژ به‌رى!