بهرههم - نڤیسار
مهسعوود خهلهف
کێلیکێن رهملێ بهرى وێ رۆژێ تو د هاتى و كێليێن من خوه ژ پێسيرا وێ سبها زوو دهاڤێتن، وێ سبهێ دهنگێ ته هات، تو ههر ئهو ناڤى, يێ كۆ د ميهرابا ئهڤينێ ده ههستێن من دخوارن. گهر تو دچێ بچه، ڤێ جارێ ژى ل هێڤيا زهنگلێ مرنا من نهمينه، ژ خوه تو ههر دچێ و ههر دلێ ڤێ شهڤێ ل صهبرا ستێركا شهڤا دى دگهرێ، جارنا تو گهلهك نێزيكى دارستانێن شهوتى يێن ڤى دلى دبێ، لێ ديسان تو چاڤێ خوه دگرێ و دهرباس دبێ، جارنا ژى تو دبێ شهڤهكه رهش و خوه ل دلێ ههلبهستا من دپێچێ. گونهێ من تهنێ ههلبهست بوو دهما من ئهو ژ زندانا دلێ خوه ئازادكر و تو بووى جهلادا وێ، گونهێ من ههلبهست بوو و تو بووى سێدارا وێ. ڤێجارێ ژى بچه و ل سينۆرێن خوينا من مهيزه نهكه، هينا تو فێرى ڤهخوارنا كهلدۆمانا ئاگرێ دلێ من نه بوويه و هينا تو تهنێ يى، لهوما ژى دهنگێ چيايێن د هندرێ من دا, نهما صهبرا دلێ ته د هێنن. ئهو هێڤيێن ل بهندا ته مابوون, ته ئيرۆ د زكێ گولێن غهريبيا من ده شهوتاندن و تو چووى. من ئيرۆ ههمى دۆستێن خوه جڤاندن، دار، ئاخ، ئاسيمان، ئاڤ، گهنم، باژارێ تۆزێ، ههلبهست، چيا، ئاگر، هێسر، شهڤستان و مه بهحسا وان بيرئانينێن سالێن چووييكر… ههميان گۆت: چما تو دههلێ، چما تو دنالێ، كێ ئاوازێن ته دزين… وى وهختى ههيڤێ گۆت: بهێلن ئاڤا وى چهمى بههركێ، بهێلن، دلێ وى ئيرۆ دمرێ، ئيرۆ وى ژى دۆستانيا مرۆڤان كر. ڤێجارێ ژى بچه و ب كێليكێن رهملێ ره برهقسه، ب ئاڤا دهريايێ ره دين ببه، لێ بهرى تو ههرێ خاتر ژ من نه خوازه، لهوما تو ههر دچێ و دچێ. ڤێجارێ ژى بچه و پهيڤێن من ژ بۆ من بهنێره، ئهو ههلبهستێن ته خوهندن، گونهێن من، دۆستێن گۆرا منن دياريێن سهدسالا ژبيريكرنێ نه، ئاريانێن داويا هێسركه كوشتينه.
پرتووک
کێلیکێن رهملێ