|
بهرسڤهك بۆ بهرێز دلشاد عهبدولرهحمان
وهزيرێ پهروهردهيا كوردستانێ
ل رۆژا
28/ 4/ 2008 د ههڤتينامهيا رووداو هژماره 4 دا، وهزيرێ پهروهردهيا
كوردستانێ پشتهڤانيا خۆ بۆ لايهنێ سهپاندنێ راگههاند، مهبهستا من
پشتهڤانيا وان 53 كهسان كر ئهوێن كو بهياننامهيهك بهلاڤكرى و
داخوازكرى شێوهزارێ (سۆرانى) ببيته زمانێ ستاندارد ل كوردستانێ. ب راستى
ئهڤان بانگهوازيێن تاكلايهنى و بێى وهرگرتنا ديد و بۆچوونێن يێن
بهرامبهر (دهڤهرا كرمانجيا ژۆرى)، وژدان و دهروونێ ههمى رۆشنبير و
نڤيسهر و زمانزانێن دهڤهرا كرمانجيا ژۆرى هژاند، چونكى دهمێ كو
بابهتهكێ چارهنڤيسساز مينا زمانێ ستاندارد كو پهيوهندى ب ههمى
كوردستانێ ڤه ههیی دهێته ئازراندن پێدڤيه بۆچوونێن بسپۆر و زمانزانێن
كوردستانێ بهێته وهرگرتن و زانايێن شارهزا د ڤى بوارى دا بهێنه گازيكرن
و كونفرانس و جڤين بۆ ماوهيهكێ درێژ بهێنه ئهنجامدان دا كو بهرههم و
بريارێن دوماهيێ د بهرژهوهنديا مێژوو و بزاڤا نهتهوايهتيا كوردستانێ
بن، لێ سهد مخابن ئهو كهسێن دبێژنه خۆ زانا و رهوشهنبير بهياننامه
و بانگهوازيێن چارهنڤيسى رادگههينن و كوردستانێ ب مولكێ باژێرێ سلێمانيێ
بتنێ دزانن و دهڤهرێن دى يێن كوردستانێ ههمى كرێدار و سهپانێن وانن.
وهزيرێ هێژا:
ئهم
باش دزانين دهمێ كو تشتهك د بهرژهوهنديا دهڤهرپهرێسيا ههوه يا
بهرتهنگ دا بيت، ئێكسهر هوين ناڤێ پيرۆزێ بارزانيێ نهمر، سهرۆكێ
كوردستانێ، شۆرهشێن ئيلۆن و گولانێ دئيننه مهيدانێ، لێ ئهم پشتراستين
كو سهرۆكێ كوردستانێ و سهرۆكێ حكومهتا كوردستانێ و پهرلهمانێ
كوردستانێ بهرژهوهنديا كوردستانێ نادهنه ب بهرژهوهنديا باژێرهكێ
بتنێ، ئهڤه ئێك. يا دووێ ژى، هيڤيدارين ئێدى بهسه د ڤان كاودانێن نازك
دا بارێ سهرۆكێ كوردستانێ گران كهن و ڤان جۆره داخوازيان ژێ بكهن.
وهزيرێ هێژا..
شاشيهكا گهلهك مهزنه كو جهنابێ ته ژبۆ بهرژهونديێن ناوچهگهريێن
بهرتهنگ كۆمهكا نڤيسهران ل دۆر خۆ كۆم بكهت و ل پشت پهردهيان ب
دزى ڤه كۆمبوونان ل گهل بكهت و دژى دهڤهرێن دى يێن كوردستانێ
بهياننامهيان دهربێخن، ژبهركو ژبيرنهكه تو وهزيرێ پهروهردهيا
حكومهتا ههرێما كوردستانێ ى نهك وهزيرێ باژێرهكێى، چارهنڤيسێ ههمى
قوتابى و پهروهردهيا كوردستانێ د دهستێ ته دايه و گونهها وان
دكهڤيته د ستۆيێ ته دا، نابيت تو لايهنگيريا خۆ بۆ دهڤهرهكێ يان
باژێرهكى راگههينى، پێدڤى بوو تو ل گهل لايهنێن بهرپرس و
پهيوهنديدار د حكومهت و پهروهردێ دا روونى و بسپۆر و شارهزايێن د ڤى
بوارى دا ژ دهرڤه و ل ناڤ كوردستانێ كۆم بكهى و ديد و بۆچوونێن وان
وهرگرى و ئهنجامێن دوماهيێ بۆ مللهتى رابگههينى.
هيچ
رۆژهكێ ئهم مافى نادهينه خۆ كو شێوهزارێ كرمانجيا ژۆرى ل سهر
شێوهزارێ كرمانجيا خوارێ بهێته سهپاندن و مافێ قوتابيێن ههوه بهێته
خوارن، چونكى ئهم د پشت راستين ئهڤه كارهكێ شاشه و مه باوهرى پێ
نينه، ئهڤ چهنده بريارا خهلكێ وێ دهڤهرێ يه ههرچهنده پشت راستين
ژى كو هيچ رۆژهكێ جهنابێ ههوه ژى ڤێ چهندێ قهبوول ناكهت.
وهزيرێ هێژا..
تشتێ
ئهم دخوازين ئهوه كو ب ههردو شێوهزارا بهێته خواندن يانكو وهكو جۆت
شێوهزارێن ستاندارد ل كوردستانێ بهێنه بكارئينان مينا وهلاتێ (نهرويج)ێ
، دهمێ ئێكێ نهرويجى زارۆيێ خۆ رهوانهى قوتابخانێ دكهت پرسيار ژێ
دهێتهكرن كا ب چ شێوهزار دێ خوينيت، چونكى دو شێوزارێن ستاندارد ل
وهلاتێ نهرويجێ ههنه و خهلكێ وان يێ ئازاده كيژان شێوهزار ب
هلبژێريت، ئهڤه نه بتنێ ديد و بۆچوونێن خهلكێ دهڤهرا كرمانجيا ژۆرى
نه، بهلكو ديد و بۆچوونێن گهلهك شارهزا و بسپۆرێن زمانهوانى يێن
دلسۆز و كوردپهروهرن مينا (د. ئهمير حهسهن پۆر، د. رێبوار فهتاح و
حهسهن قازى) كو ئهڤه ههرسێ ژى ب شێوهزارێ كرمانجيا خوارێ دپهيڤن و
زانا و شارهزانه د بوارێ زانسێ زمانى دا، لێ ژبهركو بۆچوونێن وان د
دووربينن و هزرا وان يا نهتهوهيى ژى يا پان و بهرفرههه لهورا ژى
نڤيسين وبۆچوونێن وان د سهرپێ نينن و ب رهنگهكێ زانستى و واقعبينانه
هزردكهن.
ل
دوماهيێ داخوازێ ژ ههمى زمانزان، بسپۆر، نڤيسهر، رهوشهنبير و
سياسهتمهدارێن كوردپهروهر و دلسۆز ل دهڤهرا كرمانجيا خوارێ دكهين كو
مافێ يێ بهرامبهر بپارێزن و پالپشتێن بنهمايێن ديموكراسيێ بن و ژ زمانێ
سهپاندنێ دووركهڤن و ئهڤێ بريارێ بۆ مه و زارۆيێن مه بهێلن، كو ههر ل
قووناغا ئێكێ سهرهتايى تا قووناغا دوماهيێ ژ زانكۆيێ ب شێوهزارێ دايكا
خۆ بخوينن و بنڤيسن و پهروهرده ببن، ئهڤه ژى مافێ مه يێ رهوايه،
ئهگهر ههوه باوهرى ب مافێ مرۆڤى و ديموكراسيێ و بير و بۆچوونێن جودا
جودا ههبيت.
| 
