بهرههم - نڤیسار
ژڤانێ من و وێ بههشتا هێشتا نهبوویی
سترانا پارچهبوونا زینێ
عارف حیتۆ ( ههلبهستڤان و نڤیسهر)
ژڤانێ من و وێ بههشتا هێشتا نهبوویی
(1)
گلگامشى دوو سترانێن كهسك ڤێ بوون
ئهنكيدۆ يى... پهلهكا كهل داعوورا!
ئاگر ب حهزانڤه هلكرن
ستێران ژبو نهمريێ... سهما كرن
عاشقان پێك پركرن
نه قهدهر لێڤه بوو
نه گلگامش!
(2)
ما ئهز دێ ژبيركهم!
كو رۆژهكێ...
ته, ب وان لێڤێن خوه يێن گهرم
روويێ من داخ كر بوو!
ما ئهز دێ ژبيركهم
كو ته – ئهوێ پيرۆز و بێ رهحم –
ب تنێ هێلا بوومه ل ئاقارهكى
بێ قورئان
بێ نڤشتى
بێ ئاڤ
گورگان, رێكا خهونا من كورت كر بوو!
(3)
ئهڤه بوچى؟
تو هنده سهح دكهيه دێمێ من
ئهوێ باركرى ب خهمان و,
مشت ژ كهلهمان
تهوتهمهكا ب ئهنيا منڤه
ل بن كهفشى, نڤشتييهكا مهلا حسۆيى
من ژ عشقا ته دپارێزيت
لێڤێن ته چهند شهبهقينه
نێزيكى دێمێ من نهكهى!
لێڤێن ته دێ بريندار بن
ئوو ئۆبالهك دى يا گرچن
دانى يه سهر من!
(4)
ئهوێ مهيگێر
بو من بيرهيهك دانا و چهند لبێن باهيڤان
دبێژن باهيڤ... نێراتيێ دئازرينن
ئوو نێراتى,
برينێن كوور يێن شكهستنێ دكهوينن!
(5)
بهرى ههيامهكێ
ژدهف كچكهكا خهمۆكى لێ
نامهيهكا ب تێلهفۆنێ بو من هات بوو
وێ كچكێ دگۆت:
خهما نهخۆ... خهم گرانن
لهفا بخۆ... ئهو دههرزانن
من دهڤ ژ خوارنا خهمان بهردا
برسێ كوشتم.
(6)
ته دلهك دڤێت, يان شعرهك
دل من دانا سهر سينگێ يارێ
شعر ژى
ته گولهك دڤێت, يان ئهڤينهك
گول من كرنه رستك و دانه بوهارێ
ئهڤينى ژى
ئوو ل بوهارێ
دهمێ يارێ ڤيايى روويێ من ماچى كهت
بهستهلۆكێ لهشێ گهرم داپۆشى بوو
چ نهما بوو بكهمه كوارێ!
(7)
ژنشكهكێڤه...
خهمهكێ كوونێ خوه ل دلێ من ڤهدا بوو
كولهكێ... مالا خوه دانا چاڤێ من
خهونهكێ پێنگاڤا من گهزت و
كچكهكا پيچهكێ ژمن بچووكتر
ههموو ژيێ من خوار
پێنگاڤان ئهز ڤهگهراندم
بهر ب بوهارا سالا پار.
(8)
من چ ژ وههمان نه دزانى
ههتا من شعر ديتى
من چ ژ سههمان نهدزانى
ههتا من شعر ديتى
شعرهكا هار .. كرمه دوو پرت
يهك بهههشتى و يهك جههنهمى
دهمێ ل جههنهمێ ..
كهنيا هوورى يێن رهند, من دخاپينيت
دهمێ ل بهههشتێ...
پهلێن گهرم
دلێ من يێ جهمهد گرتى دئازرينيت.
(9)
پێنگاڤان گۆت:
بهرهف كيڤه دێ مه دهى رێ
من گۆت دێ چين
بهرهف ئاسمانى
بهرهف ژڤانى
ژڤانێ من و وێ بهههشتا هێشتا نه بوويى!
(10)
رۆژهكێ كچكهكا موحهجيبه
ژڤانهك دا بوو من!
نه چووم ژڤانى...
ب دزيكيڤه, روحا من چوو
زهلامهكێ ريه درێژ و ب عهمامه
روح زڤرانده دلهشێ مندا
كليلهكا تهناهيێ كره دپانكا دهستێ مندا و
ترسهكا كوژهك هێلا دچاڤێ مندا
ناسناما من .. ب ئاڤێدا چوو.
پرتووک
ژڤانێ من و وێ بههشتا هێشتا نهبوویی