ههلوهسهيێن زينێ
عشق ب ئهنيا وهلاتيڤه عاره
ئهز ب رێڤه دچم و كفنێ من ژى دێ گههته من
خهريييهكێ رهشمالێن خوه,
دناڤ گهردێن حهزا من يا نيڤ ڤههووسيايدا چاندن و,
دێ دهنگهكى كهته بهر من
دهنگ .. دێ خهريبيێ دچاڤێن مندا ڤهكهت
بارهكێ ژڤانا و هيڤى يێن رويت
دێ ژ مژويلانكان ڤهكهت
ئهز ب رێڤه دچم و خهون خوههكه,
ب لاما منڤه دبيته جۆبار
دبيابانا ڤيانێدا دبيته رووبار
لاما خهونێ .. بريندار بوو
برينا لامێ دورِييهكه, يا دبيته كهف
ئهز حهز ژ كهفا بيرێ دكهم
يا شيرى ژى!
ئوو ئهز مرۆڤان دحهبينم
چ قهومييه؟!
ئهڤ مرۆڤه ل من خرڤه بووين!
كهفن
كهفن
كهف ..
من زينێ دزى, ددلێ مندا بوو
من راستى گهزى ب دهنگێ منڤه بوو
دهنگێ من يێ ژمن كهفتى
نه رۆژا سپێدههييان بر, نه يا ئێڤارييان
نه سهر گويفكێ گوندييان بر, نه گلێشێ باژێرييان
پهيڤا من .. ئهوا ب وێرهكى زاى و ب ترسنۆكى فرشككرى
ئهوا دتووركێ ديرۆكێدا ماى و ل ئاسمانێ سامال فرِى
بسترينا بلبلهكێ چهنگ شكهستى بوو
ل سهر لێڤێن ئهوێ كچا ژبێدهنگيێ بوويى
گليزانكێن باى ڤهدكر و,
ههوا ب عشقێ يێ دووجان بوويى
پسته – پستێن عشقاوى يێن شهيدايى و كهل
گليزێ بهستيێ ب دهڤێ لاوانڤه مايه ههل
ل بهر دهرگههێ دادگههێ چوارگاڤانێ دكهن
لهشێن سار, ب ديوارانڤه ديكۆرن
پهيكهر .. بهربوونه ئێكودوو
جادده گريان
شوستهيێن ژڤانان حهليان
ئوو بهلگێن كاليپتۆسێن خوهراگر ژى, وهريان
كهفا دهريايێ خوريانێ دئێخته پێنگاڤان
پێنگاڤا رهسهن, شهرمێ دكهت و پێ دههرميت
ئهز حهز ژ كهفێ دكهم ..
كهفا بيرێ
يا شيرى ژى!
دێمێ زينێ يێ دوهرميت.
زينێ رهڤى بوو رهبهنێ زينێ رهڤى بوو ژ مالا
چوو بو سهر ئاڤێ رهبهنێ زينێ ئاڤا ل بهر مالا
ئاڤا رابى بوو
پرا شكهستى بوو
چبكهكا خوينێ
كهفت ژ لهشێ زينێ
رهبهنێ زينێ پێ نهزانى بوو
زينێ دزى بوو
چ نه دزى بوو
رهبهنێ زينێ
گهرمێ گهزى بوو
دوو سێڤێن بچووك ب سينگيڤه بوون
يا ژ خهلكى ههميێ ههردوو دزى بوون
گونههێ شهرمكر ژ روندكێن زينێ
چاڤێن خوه گرتن ژبهر چبكا خوينێ
سوار هاتن و چوون كهربێن وان ڤهبوون
قهيدێن وان قهتبوون ب وهروهره بوون
زينێ نهديتن
رهبهنێ زينێ
زين يا ب تنێيه.
زينێ .. بهلگهكێ كهسكێ جهمبلعهشقهكێ بوو
دچاڤێن مندا, تراخۆما
ئهز ب رێڤه دچم و كفنێ من ژى بهرى من دچيت
خهريبيێ .. سترانهكا حهمله ب خۆشيێ كره بهر من
ئهز ب خۆشيێڤه سهقهت بووم
من پێناسهيا فرِينێ هلگرت و چووم
سترانا من, ئهوا ب زهنگل
ئهوا سهما
ئهوا باركرى ب فيغان و خهما
كره دپاخلا گهرما رۆژێدا, رۆژا چاڤ زل
خهونان هێلامه چاڤهرێ و هلاويستى
خهونن .. خهون
ما دێ چ بيت ئهگهر خهونان ببينم و
پێكهاتنهكا دووقۆلى دگهل كفنى مۆركهم
كفن ..
بێژهنكاريێ دادئێخته گهوريێ و بێدهنگيێ چێ دكهت
دهنگ ..
دهنگێ وهروهرێ!
زينێ ژ خهوا بهنجداى هشيار دكهت
زينێ خهونهكه, دخهونا من يا خهونۆكيدا
زينێ خهمهكه, دچاڤێن من يێن خهمۆكيدا
من خهمێن خوه باركرن
ههسپێن كهحێل صنگهپێ بوون و مانگرتن
بروميتۆس ب ئاگرڤه هاته گرتن
ب تنێ ل بهر دهرگههێ پهرسگههێ
تێهنى ل شهرگههێ
وهزێ چ بكهم, ژبو رێژگههێ!!
زينێ, خهمهك هلگرت و ئێك دانا .. خهونهك ديت و ئێكا دى دا بهر ددانا.
گولهكا بوهارى ژ باخێ ميرى چنى, كۆلكهك ژ خوه و خوينێ هونى. مهمۆ ديت ب
شاپهرڤه ل ئاسمانا, بهكۆ ديت يێ بوويه قافكێ ژڤانا. دهست كره فريزێ
بهر حهوشا مالێ, سترى يێن تيژ تبلێن وێ هنجنين. شهربهتهكا سۆر, وهكو
خوينا تبلێن وێ سۆر, دا سهر دهڤى و قهنهقوين بوو ل سهر ئهزمانى
بوويه سنۆر. دلبۆرينهكا دلسۆژ گرت و ب ئهنيێڤه خوه بو خوناڤ,حورى يێن
بهههشتێ و پهرى يێن ئاسمانى, ههموو هاتن و كهفتن هنداڤ. بێهنا بارووتا
وهروهرێ, ژ دفنا وێ نه هات دهرێ.
زين ب تنێ, دناڤبهرا چوار ديواران .. سهرێ خوه توند ل ديوارى دا و
قێژييهك بلند, ههر چوار كنارێن جيهانێ هشياركرن. دهنگهكێ دلۆڤان ژ
بوشاييێ كهفته بهر گوها:
زينێ .. "نهكه گرى, نه يا جوانه, مخابنى وان چاڤانه"
ئهو چاڤ بو گريێ نهدانه", نهكه گرى .. نهكه گرى.
ئهزێ پهپووك دهمبێزا زينێ دا, ئهو زينا هلوهشيايى, ئهوا ل سهر
تهختهكێ دارى رازايى و ئاگر ل بن دانايى. ئهوا ب گونههان رادايى و خودێ
و پێغهمبهران هێلايى....
وهزێ ههلچوويى و ژ ههموو تشتان كهربڤهبوويى
دێ كاروانهكێ پهيڤان ب رێكم ...
وهزێ گلوازهكێ نێرگزان ژ كهزيكێن دايكان چێكم
وهزێ حهزێن ئازراندى يێن هلگرتى
ئهيۆنێن گهرمێ گرتى و لاپهرهيێن درێژێن تهبگرتى
كهمه عشق و ههناسهيێن وهستيايى يێن خاتوونا فهخرا لێكم
وهزێ تهرتيلهكا ئهبهدى يا نابۆ يى بێژم
وهزێ ههستهكا سهرمهدى يا فيرهايى
ل بهر دهرێ پهرسگهها ئيزيداڤه نێژم
وهزێ سلاڤهكا سهماكهرا مشتى ئاشتى,
ژبو سهماڤانێن جزيرا بۆتان فرێكم
وهزێ دهنگرا خهمان
ل سهر شينوارێن مزگهفتا سۆر پێكم
خهمێن هاژۆتى
تاناتۆسێن ل بهر جووتى
هيڤى يێن ئهلند نهديتى يێن دۆتى و
ديتنێن خۆشێن ژ گهرما سۆتى
وهزێ پلنگهكى ل سهر كارتۆنهكا سپى يا هاڤێتى,
نهخشينم و عونفێ پێ كم
عونفێ .. خهونێن نازك رهڤاندن
پهيڤێن وێرهك و بانگێن ئازاد خهوخاندن
برينێن خهريبى يا زينێ, ب دژوارى ئاراندن.
زينێ رهڤى بوو
قهت نه رهڤى بوو
ل بهر گورزێن عونفێ
رهبهنێ زينێ
ههر يا نهڤى بوو.
مهمۆى ديدارێن خوه يێن پاش ئێخستى, ههموو شهرێن خوه يێن تێدا شكهستى
... كرنه دتووركێ نههشيێدا و گۆپالێ مفرهقێ هلگرت. ههلبهستا وى يا
نيڤهك ژێ مايى و گيانێ پرت پرتێ زينێ, ل سهر رووبارێ تههارهتێ خوه
تافيل دكر.. ژ گونههێن كرى و يێن نه كرى, ژ عشقا بوويه دهنگ و
دمۆزهخانێدا ژبيركرى. كهفا سابوونێ, مينا كهفا شيرى يان يا بيرێ, دناڤ
لاتێن هشكبووييدا مهلسى. تهبهقهكا ئاسمانى ژبهر خهريبى يا وێ يا
چهندين سالان فهتسى.
خورتهك ژ كهفێ چێبوو
خاتوونهك ژ كهفێ چێبوو
كهفێ, كهف دا و ژ كهفێ .. لهشكهرهكێ مرۆڤان چێبوو
لهشكهرهك ژ كهفێ, ژ كهفا بيرێ, يان يا شيرى ..
ب كوبارى
ب تهييسۆكى
كهفته بهر دهرگههێ ميرى.
* *
لێڤێن زينێ شهكر ژێ دبارى و
ژ نهئێن وێ, گوللهيێن تفهنگان
دناڤبهرا شهكرا رشتى و گوللهياندا
سترانێن كهسك
يێن بێ سهرناڤ
كههى دبن و دزێن و ڤهدزێن
دبنه تانجا سهرێ عشقێ و دبنه چوگان
روندكهكا كهل و بێ روو, يا بێ ژڤان
ب دزيكيڤه چاڤێن وێ كرنه رهشمال و,
تێدا نهى, وهك دوتميران
ئهى روندكا مهست و جوان
ئهى ئهوا ته سترانێن ڤهگهرێ دگۆتن و,
تو نه دهاتى!
ئهى ئهوا چهندين جاران سل دبوويى و,
ههر رۆژ دهاتى!
ئهى روندك ..
ما تو خهونرۆژكى, يان لهشهكێ گهرم
ما تو هێزهكا گهرمى, يان پهيڤهكا نهرم
ما تو ئهزى, يان ژى تهرم
دچاڤێن مندا دنڤى
ددهستێن مندا دلڤى
ئوو .. مشتى شهرم.
زينێ ب شهرمينى هێڤ دكره دێمێ مهمۆى, ب شهرمينى دهست دكره سينگێ خوه
يێ تا نهقهبا جووتێ مهمكان خويا بوويى دئينا خوار. ما پارچهيهك ژ
لهشێ وێ مايه لێڤێن مهمۆى نه دادايێ .. ما حهزهكا سار و هلگرتى
دسينگێ وێدا مايه, مهمۆى ئاگر نه بهردايێ. لێڤێن مهمۆى خهريتهيه و
كراسێ زينێ يا ڤهشارتى. ئهنيا زينێ دورِييهكێ چيايى پێڤه بوو, سالێن
درێژێن خوهچهماندنێ يا گوهارتى.
ههر ژ رۆژا لێڤا زينێ لهرزاندى و دناڤ خوها ترشا لهشێ خوه دا بوهژاندى.
مهمۆيهكێ پاشهرۆژى دهناڤێن وێ يێن برسيدا چاندى و ئهڤ ئۆبالا خۆش و ب
لهززهت حهواندى .. ل سهر ديوارێ بورجا بهلهك سهربازهكێ كۆك, قيت يێ
راوهستايى. سترانا ترسێ و برسێ و بێداديێ بو چهمێ ديجله دبێژيت,
بيرهوهرى يێن كهسك درێژيت. ئوو زينێ گازنێن خوه يێن كپكرى ددلدا دنێژيت
...
سوپاسى يا من نهكه!
كو من تو حهباندى و,
دچاڤێن خوه يێن ب بهرچاڤكدا چاندى
رێكێن درێژ و پر مهينهت
شهڤێن سار و ب چريسهت
ئايهتا عشقا پيرۆز
دناڤ بهرپهرێن ته دا خواندى
سوپاسى يا من نهكه!
كو گول, من ژ باخێ ته نه چنين
ستێر ژ ئهنيا ته يا كهڤهر, نه ڤهكرن
ئوو, دهمێ كێلبێن برسا كوژهك
دگوشتێ من يێ نهرمدا چووين
چ نانێن گهرم, من ژ مالا ته نهبرن
سوپاسى يا من نهكه!
كو من خيانهتهكا چپلاق دگهل ته نهكر
خهونا ته يا تازى بهر ب توخيبێن دوور نه بر
دۆزا ته ...
ههگبهيهك بوو, ل سهر پشتا من
ڤهخوارنا ته ژ خوينا من
گوپالێ ته ژ نڤێژا من
ئوو, بوونا ته ژى .. ژ مرنا من
سوپاسى يا من نهكه!
نه ههوجهمه
پهيڤێن شرين و درهوين, ژ من را بێژى
ئاڤروو يا من يا پهپووك و بێوار
ژ ديتنێ ب رێژى و سترانهكا دى يا خۆش دارێژى
سوپاسى يا من نهكه!
كو سوارێن مهغۆلان ههموو رهڤين
ژبهر من يا پهياده
لێ..
چ خهنجهرێن ژههركرى و پێڤه هنگڤين
ژ پشتڤه, ل پشتا من يا چهميايى نهده!
هاى دمدمه هاى دمدمه
هاواره ل خانێ دمدمه
هاى دمدمه هاى دمدمه
هاواره ل خانێ دمدمه
من ..
ههموو خهونێن خوه/ خهونێن خوه يێن هلاويستى
ل پهى ههڤ گرێدان و كرنه ددهستێ بايدا
ئوو, حهزێن خوه/ ئهوێن ههموو خۆشهويستى
متكرن و ڤهشارتن و كرنه دگوهێ گايدا
خهونان/ نهفى كرمه دناڤ زهنگێن كهتواريدا
حهزان/ ب گرانى ئێخستمه دبن باريدا
دهمێ خهريبى يا ڤهگهرێ
مهژيێ من يێ نيڤ نڤستى, هشيار كرى
نه خهون, خهونێن من بوون
نه حهز, حهزێن من بوون
ئهزهك ڤالا ژ حهز و خهونان
دێ ماچهكێ ل روويێ كێ دهم!!
خورتهك جوان, چاڤ ڤهكرى, هێشتا مووزهركان بهركهپێ وى ماچ نهكرى, چ
تۆرينان خهونا وى يا سهرخۆش تهخت نهكرى... گيانێ خوه ژ دلى ڤهكر و ب
ئهنيا وهلاتيڤه نووساند, شتلهكا ئورجوانێ دحهوشێدا چاند, ستران بو دلێ
دونيايێ دگۆتن و تبلێن وى ب نهرمى دوكمێن كيبۆردى درامۆساند. شاشه
ڤهبوو, چيايهكێ تابۆ يێن سۆر, تبلێن وى هشككرن, ئاسۆيێن روهن مژدار كرن,
بهرزهكرن ...
چيا پالدا
چيا
چيا يێ تابۆ يێن سۆر
ههموو حهز و خهون و هيڤى يێن هلگرتى
دپانكا دهستێ ويدا دخهوچوون
ئوو ..
چيا پالدا
چيايێ تابۆ يێن سۆر
نه مهلهكێ عهرشى ل هزرێ بوو
نه مناره يا چ مزگهفتان
نه زهنگا ئێكشهمبێ ل هزرێ بوو
نه رهنگێ بههتى يێ پوليتيشييان
تنێ وهلات – ئهڤ وهلاتێ هێتيم – دچاڤێن ويدا
گولهك گهش بوو
دندكێن ئاخێ ..
دخوينا ويدا دكهلى و مسحهفا رهش بوو
چيا پالدا
چيا
چيايێ تابۆ يێن سۆر
كهڤرێن رهق, دلرهق و بێ دلۆڤانن
لهش گرانن ..
تێشكێن دههبهيێن ئاشۆپى و هۆڤانن
نه ههلچوونێن دلسۆژ ههنه
نه ههستێن نازك و ساكار
ئهو خورتێ هێژ بهركهپێ وى رهش نه بوويى
ئهوێ ژ عشقا ڤى وهلاتى هێژ تێر نه بوويى
چۆكێن وى سست بوون, قهرمين
حهزێن گهش قهرمين
خهونێن خۆش قهرمين
هيڤى .. قهرمين.
چيا
چيايێ تابۆ يێن سۆر
ژجه نهلڤى .. نه چوو
ئهوێ گهنج چوو
ئوو, بو مشهخت!!
سيلاڤێن خهونان خاڤبوون و رووبار هشكبوون
دهنگبێژێن دهنگ خورت لالبوون و نڤێژێن سبههێ متبوون
زينێ ...
خاچێ خوه دانا سهر ملى و قيت دا رێ
روندكهكا ئێكانه ژى ژ چاڤێن وێ نه هات خوارێ
هاى زينێ زينێ زينێ
زينێ چوو بو ئاقارى
گوركهك ديت بزنا خوارى
بزنا دزكێ گورگيدا
يا بوويه رهوشا وارى.
زين, ب تنێ ل سهر رووبارى
پرچا خوه يا درێژ شه دكر
تههارهتێ خوه بو لهشێ وێ چهماند و
رووبارى بو تهرتيلهكا گونههان خواند
ل پشت چناران
هندهك چاڤێن زيق و برسى
سهرێن ل بهر درهوێ شكهستى
خشخشهكا وهك يا ماران
پهردا گوهێ وێ ماچكر و جرفهك ڤێ كهفت
مرۆڤ بوون ... مرۆڤ
زينێ, حهز ژ مرۆڤان دكهت
حهز ژ چيرۆكێن ئهڤينيێ و مێرانيێ و ژيانێ دكهت
وێ نه دزانى , يان نزانيت
كهرب و كهنينا مرۆڤان
خوينهكه دناڤ پيستێ هۆڤان.
زينێ دهستێن خوه ب سينگێ خوه يێ رويس ڤهنان و خوه كره قورمچك ل بهر
لێڤا رووبارى, كهفا ئاڤێ و يا سابوونێ ژ لهشێ وێ يێ سپى دزان و رازهكا
دى – يا ب ترس و خۆش _ بهردا ددلێ رووباريدا و مرۆڤێن كهفاوى ل دۆر لهشێ
زينێ بوونه ستوون و رهڤدهكا گورگان. من حهز ژ كهفا بيرێ دكر, يا شيرى
ژى .. ئهز حهز ژ كهفا زينێ دكهم, دناڤ گورگاندا!!
شهڤێ دادا و
بێدهنگيێ كوونێ خوه ل سهر زيران ڤهدا
شنهبايهكێ هوون, خوه ب ئهنيێڤه تهزاند
پشێن وهستيايى ژ كوخكێ و دووكێلا جگارا
موويهك ژ وژدانێ نه هژاند
پێنگاڤا ل پهى
متكر
كپكر
مراند.
من ب تنێ, ئهڤ ههلبهستا ئاگر پێڤه
ژبو دلێ خۆديكان خواند
خۆديك
بێ وهفانه
بێ شهرمن
بێ ژڤانن
چ ژ ههستێ شاعرێن عاشق نزانن.
* * *
گولان – تهباخ 2007
ژڤانێ من و وێ بههشتا هێشتا نهبوویی