|
گول بهخش
پايزان گول و گول بهخش پێكڤه دوهرن
ديارى گيانێ گولبهخشێ شهڤان،ئهنسێ رهوشا شهڤێن دهوكێ.
ئهو دهمهك بوو ،ديسان كوم رهشان سنورێ وهلاتى چيت كرين، ته
پهنا بربوو پهيڤێن مام چهلو روژا بانگينا دلتهزين، ئهرد و
ئهسمانێن گوندى پێكڤه گرين،نخريێ وى ل كوپهكى بلند بلند فرى.
رۆندك پانگاندين و نهڤيايى ژ بلنديا خوه داكهڤت.تنێ گوتى:"مامۆ،
مرۆڤ ژ نفشێ ئاخێ يه و دێ ههر بۆ ئاخێ زڤرت، چ رۆژهك ل پێش و چ
روژهک ل پاش، خوهشيا مرنێ د هندێ ده يه کو ب مرۆڤى بێژن و ژنك
بهرگویزان ژێك برهڤێن و نهخوهشيا مرنێ ئهوه، گاڤا بێژن سوپاس
ژ خودێ ره دان و عهمرێن خوه بربوون، ژ وێ ئهشكهنجێ هاتهدهر.
هێژ تو يێ دڤان هزران ده، وێ دهليڤێ تهدخوازت ل جهێ پێ خوه بچى
مرنێ، نزانم چاوا وێ شهڤێ تو و ههردو ههڤالێن خوه يێن فانتازیک
ڤێك كهڤتن، پشتى وه چهند جاران پێكێن خوه بلندكرين و تهژى
بورك هاتينه وه، ههڤالێ ته ئهوێ هوین دبێژنێ (فهيلهسوفێ
ئهرد و ئهسمانان) گوت: "ههڤال ههگهر ئهز مرم، هيڤی دكم
كهلهخێ من ببنه كۆپهكى بلند و نهڤهشێرن"تو كهنى و ته گۆت:
"ههڤال تهچ نهگۆت... ئانكو ئهلهو ته بخون دا تو ههر بلند
بمينى، تهنهڤێت ببی مهولود وكرم و كێز ب ته حهمهربن؟ ها ها
ها!".
ئهوێ ب رهخ تهڤه گوت: "هوین چهند فانتازیکن، ئهز دبێژم
كهلهخێ من بكنه ديارى بو كوليژا پزيشكى بلا خوێندكار ل سهر من
فێربن نوژداريێ،چێتره ژ كرم وكێز و ئهلهۆيان" ديسا توكهنى و
تهگوت: "باشه ههڤال، من چاڤ نهمانه ئهڤه ههردو بيبلكێن ته
ديارينه بۆ من ههگهر پشتى ته بمرم!" ديسان هوین ههرسێ كهنين،
ژ نشكاڤه شهبهنگ و بێهنا گولان هات و دهستێ خوه د سهر ستويێ
ته ئالاند و گوت: "وه شهڤ كوشت، كهنيا وه بلنده. دياره
وه پێكهنۆكهكا نوی ههيه؟" ته ستوویێ وى قراند و گوت: "چو
نه... ئهمێ بهحسێ مرنێ دكن!ئهڤى دڤێت ئهلهو كهلهخێ وى بخون
و ڤى كهلهخێ خوه كره ديارى بۆ كۆليژا پزيشكى!".
" و ته؟".
" ئهز دبێژم نۆ.نه بلا كرم و كێز من بخون و نه ژی ئهلهۆ،بلا
كهلهخێ من ل جههكى تارى و گهرم بهێلن ههتا گهنى دبت، پاشێ
بهاڤێژنه بهر هندهك كویچكێن برسى، چنكو ئهو هێژاترن ژ كرم و
كێز و نوژدارێن بازرگان".
ئهنۆ رهڤى و گۆت: "وهی بابۆ،ههر مرنه شهڤا وه".
تهدهستێ وى گرت و ماچی كر، ته گۆت: "مه يا خوه گوت بهلێ تو چ
دبێژى ئهنۆ؟".
" ئهز وهكى ههموویان... ههگهر مرم، سوبێ زوو كهلهخێ من
ببنه گرێ شاخكێ".
سپێدێ ئهلند بلند بوو، روژێ داڤێن خوه يێن زێرين پهشين،كوليلكێن
پايزا رووبكهن گهردهنا خوه كهشكرن، بێهنا خوه خوهشكرن ،ل
ژڤانێ تلێن گولچنێ جاران. لێ وێ سوبێ گولچنى وهغهركربوو گرێ
شاخكێ.
تێبینی 1
"گرێ شاخکێ" گورستانهکه ل باژیرێ دهۆکێ.
تێبینی 2
ئهڤ چیرۆک ژ کهتواری ( ریالیتی ) یه، ههرسێ ههڤال : ئیسماعیل
هاجانی، کهمال سلێڤانی و سهبری سلێڤانی ل سهر ئێک ماسێ بوون و
ههرئێکێ وهسیهتا خوه بهری مرنێ دگۆت، پاشی رهحمهتی ئهنۆ "
ئهنهس" هات و ل رۆژا دی وهغهرا داوییێ کر.
|
.jpg)