كاوار        

پشتى ته‌له‌فون داناى، مينا بچوكان دخريك چوو، لێڤا وى يابنى له‌رزى وهێرشك و ئيسك پێكڤه‌ هاتنێ ،هه‌ر لبن چه‌نگان دداو .ژ ژورا خوه‌ ده‌ركه‌ت و قه‌ستا دولابا خوه‌ ياكه‌ڤن كر.خانما وى خوه‌ ب سه‌رچ ڤه‌ نه‌بر وگوت:

- ئه‌ز حه‌يران هه‌ما ئه‌و ژى وه‌كى هه‌موو يان بلا ناڤێ خوه‌ بگوهورت!نێ هه‌كه‌ ناڤێن خوه‌ نه‌گوهورن چ نادنێ !

هێژ ده‌نگێ وى دگوهانده‌ دخه‌ونێ باب ببوره‌ من ناڤێ خوه‌ گوهارت. ئه‌ز ژ ئه‌ڤرو پێڤه‌ نه‌ كاوارم .

وێنێ دايكا وى ژ دولابێ ئينا ده‌ر و هندى دى مينا كزكان حه‌ليا. ب تلێن خوه‌ كه‌ژێپوراوێ يێ چورشه‌كر و بنازكى گوهێ خوه‌ ب. زكێ وێڤه‌ نا ورتمێ لێدانێن دلێ وێ و بچووكێ وێ خوه‌ شترين موزيك بوو دگوهێن وى ده‌. وێ ژى بنازكى مينا دايكه‌كا دلوڤان تلێن خوه‌ كربوون شهـ‌ و پرچا وى يا بۆر شه‌هـ ‌دكرو ب خوباى دگوت:

-هه‌كه‌ كچ بوو دێ ناڤێ وێ وارين بت و هه‌كه‌ كور بوو ئه‌مێ ناڤێ وى كنه‌ كاوار،بلا ئه‌ز حه‌يران.

-ئه‌ز هزار جاران حه‌يرانى ته‌و ڤى مێڤانێ چاڤه‌رێ بم ،تو چ بێژى دێ وه‌كى ته‌بت ما ژڤان هه‌ردو ناڤان خوه‌شترهه‌نه‌!

هێژ ده‌نگێ وى دگوهانده‌ ،ده‌نگ ڤه‌د دا:

-باب ئه‌ز ئه‌ڤرو ،نه‌ كاوارم چنكو،نه‌من چ وه‌لات ماينه‌ و نه‌چ وار، ئه‌ز چه‌قكى دار زه‌يتونا كيفكوييمه‌، دناڤ كه‌فا ده‌ريايێن سۆرده‌ وه‌رميم ...برينداره‌كى ڤه‌ره‌ستى مه‌ ژ به‌ر كێلبێن درنده‌ و نه‌هنگێن ده‌ريا، ما ته‌ لبه‌ره‌ ناڤێ من چ بت؟ نه‌خودێ داييمه‌ هه‌تا ئه‌ڤرو بێژنه‌ من خودێدا، به‌لكو ژ ڤه‌رێژا قه‌ده‌ره‌كێ مه‌ و قه‌ده‌ر د بێ ناڤن ، له‌ورا من ناڤێ خوه‌ كره‌ چه‌لووپ . هه‌كه‌ ئه‌ز چه‌لووب نه‌بم چ نادنه‌ من . نه‌ مافێ په‌نابه‌ريا مروڤايه‌تى و نه‌يا سياسى ، ،ئه‌ز دزانم كا ناڤێ من ل جه‌م ته‌چه‌ند پيروزه‌ لێ لڤى  وه‌لاتى هه‌موو پيروزيێن ته‌ ب فرنگه‌كێ ناچن،قه‌ده‌رامه‌يه‌ ،ئه‌و هوڤێن دوهى نه‌تنێ ئه‌م به‌لكو مروڤايه‌تى هه‌موو ژ به‌ر دنالى، مروڤن و وژدانا مروڤايه‌تيێ بو دسۆژت،خوه‌ش مێڤانن.

جگارا داويێ ژ پا كێتا خوه‌ كره‌ دناڤ لێڤێن خوه‌ره‌ و مينا سه‌ر خوه‌شان ژ مال ده‌ركه‌فت و ل ترومپێلا خوه‌ خورى خوارو ڤيج مينا شان شانوكێن زاروكا و به‌ره‌و گورستانێ چوو،تارى زولماته‌كا بێ وێنه‌،مرى ژ مريان دترسيان،ل به‌ر ده‌رێ گورستانێ ترومپێلا خوه‌ راوه‌ستاند. مينا دزاب ترسو سه‌هم ..هێدى هێدى مه‌شيا و ل به‌ر كێليه‌كێ راوه‌ستا ،سه‌رێ خوه‌ شوور كر و بكێليێ ڤه‌ نا و گوت:

 -تو دزانى ئه‌ز چما ئه‌ڤ شه‌ڤ هاتيمه‌ ديدارا ته‌ خانم؟

 تو دزانى كاوارى ناڤێ خوه‌ گوهورى،ئه‌و ناڤێ پيروزێ ته‌ لێ ناى؟

دبێ ده‌نگيا شه‌ڤێ ده‌ ،نه‌ستێره‌ك دبرسقى، نه‌ چ فريشته‌يان پێلێن ئه‌وران دهاژوتن،نه‌چ ده‌نگ ژ منارێن مزگه‌فتان دهاتن و نه‌چ چه‌نگه‌چنگ ژكنيشتا،ده‌ستێ خوه‌ دگه‌رده‌ناوێ ئالاندو به‌تلێ ئۆزو ژ پاخلا خوه‌ ده‌رئانى و مينا زاروكه‌كى دايك مرى لێڤێن به‌تلى هلمريستن بێ ئيسك و عێلنجى، ب تونه‌كى گرى و ده‌نگه‌كى خه‌تمى ڤه‌ دوباره‌ دكركاوار ناڤێ خوه‌ گوهورى!

ل گه‌ل ده‌نگێ گريا وى هه‌موو مرى رابوون شه‌هيد،جاش، شه‌ريف،خوێرى ،،مه‌لا و سوفى،قه‌حبه‌ ل دور ئێورين و كفنێن خوه‌ كرنه‌ ده‌ستمال وپێكڤه‌ بۆ گرين و گرين.