بهرههم - نڤیسار
ستۆک
ئیسماعیل هاجانی ( چیرۆکنڤیس )
ستۆک
ل سێريانا هه، گازينۆيهكا كهڤنار ههيه، مێزهك دانايه و ياريكهرێن مهزن ل بهرێكن، ئاگههـ ژ دهمى نينه، سالێن وان چركهنه و چهرخێن وان برگهنه، ژ شهشێ تا بيست و ئێكێ ل بهرێكن، نهدوهستن، نهرادوهستن، يێن پێكڤه حولى بووين.
ئهڤه ههيامهكه قهرهچهك دهێته ڤێ گازينۆيێ مۆريا ڤهدگرت، بهختێن رهش سپى دكت، قهرهچهكا بهژنزراڤه، دهڤ و لێڤ شرينه، مێياتى ژێ دبارت، هندا مهردانهيه تو بێژيێ دههمهنا خوه راكه، بێ ئێك و دو رادكت، بێژيێ ماچهكێ، سێيان ددت، گهلهكا سهيره، حهز ژ بازنان ناكهت و تهژى زهندێن وێ بازنن.
وێ رۆژا هه دهستێ من گرت، پهرخاند و بهختێ من خواند، سهرێ خوه ههژاند و گۆت:
ـ ژيێ ته گهلهكێ درێژه، ته ئاڤا حهياتێ يا ڤهخوارى، زوو ب زوو نامرى، ژ ههبوونا ئادهم تو يێ ههى ههتا نهبوونا ئادهم، لێ ته هند باوهرى ب خوه نينه هندى ب خهلكى ههیی.
هێژ تلێن من د ناڤ دهستێن وێ ده، ديسا گورده گوردا دهنگێ ياريكهران ل پشت مێزێ بلند بووڤه.
ئێكى دگۆت:
ـ ستۆكا خوه پهيت بكه.
يێ دى دگۆت:
ـ ما وه چ مايه ههتا هوين ياريێ سهرا بكهن؟
ئهوێ بهرامبهر، دهستێ خوه بره بن كهفشێ خوه و پرتووكهكا كهڤن و بهرگ و لێڤ درِياى ئينا دهر و ب لێڤێن خوه ڤهنا، دانا سهر مێزێ و گۆت:
ـ ئهڤه بهيتا من.
ئهوا ب رهخ ڤه، ژ پشت مێزێ رابوو، قولپهكا سينگێ خوه ڤهكر و دهستێ خوه دانا سهر مهمكێن خوه يێن رويس، گۆت:
ـ ئهز ب ڤان جۆتێ پيڤۆكان دێ هێمه ياريێ.
د ڤێ ناڤبهينێ ده دهنگهكێ تويژ ژ گۆرستانا بهرامبهر هات، ههمى ل خوه زڤرين؛ مريهكى سهرێ خوه و دهستێ خوه يێ چهپێ ژناڤ كفنى ئينابوو دهر وهكى كهنگرووا، جۆتكانى خوه دهاڤێت و دگۆت:
ـ راوهستن ئهز ژى ياريكهرم.
ههميا پێكڤه گۆتێ:
ـ ما ته چ ههيه ههتا تو ياريێ سهرا بكى؟
ئهوى ژى ژ دوورڤه بهرسڤ دا:
ـ ئهڤه كفنێ من.
چاڤێ ههميان ما ل خودانێ ستۆكێ، ئهوى ژى ب قهبهڤه دهستێ خوه بره پاخلا خوه و كاغهزهكا مهزن و نهخشاندى دانا سهر مێزێ و گۆت:
ـ ئهڤه نهخشێ وهلاتێ من ستۆكه، ڤێجا وهرنێ گوند.. گوند، باژێر.. باژێر ل بهر ههوه.
* ئهڤێ چيرۆكێ خهلاتێ ئێكێ بر د بهريكانا رێڤهبهريا رهوشهنبيرى و هونهرى ل دهۆكێ ئهوا هاتيه سازكرن ل 10/12/2005ێ.
پرتووک
1- شهڤا فرێشته رهڤین - کورتهچیرۆک
.jpg)
