شه‌ڤه‌كا ب تنێ

پشتى مريشك داكرينه‌ كولكى و سێ هێكێن ب زلق وخوين راكرين ده‌ريك لێ گرت. رۆژێ چاڤێن خوه‌ نقاندن و شه‌ڤێ ئه‌رد كره‌ به‌روكا خوه‌ و په‌ردا خوه‌ داپوشى. ئه‌و ى دودل بوو ل مال بنڤت يان ژى بچته‌ مالا هه‌ڤالێ خوه‌ ئازوى. لێ ب هيڤى بوو پيرا وى دێ هه‌ر زڤرت نه‌خاسمه‌ پشتى بيرا وى ل په‌يڤێن وێ هاتى، به‌رى بچت "كورێ من ئه‌زێ ڤان هێكا و دوخين و گۆرا فروشم و هنده‌ك شه‌كر و چا و سابوونێ كرم و بۆ كۆرێ خوه‌ ژى شه‌كروكێن كوپالوك ئينم و ل بايێ خوه‌ زڤرم، دنيا يه‌ گيروبووم مريشكێن خوه‌ داكه‌ نه‌كو رويڤى ب شه‌ڤ بكه‌ڤته‌ ناڤ، پاشى يابێژت قت بومه‌ناهێلت، باشه‌ مه‌رگێ پيرێ؟".

دڤان هزرانده‌ گوهشى بوو ،گوهێن وى دڤه‌چنى بوون  كا كه‌نگى دێ ده‌نگێ  قه‌نته‌رێ هێت، شه‌ڤ پتر ره‌ش وتارى و بێ ده‌نگ بوو، جاره‌كادى هزركر بچته‌ مالا هه‌ڤالێ خوه‌ ب نڤت. ڤان په‌يڤا پتر رژد كر، كوب مينته‌ ل مال، دا ئه‌و زرتا ل ناڤ هه‌ڤالان كرى د كيسێ وى بمينت. ده‌مێ ئازو گوتيێ هه‌كه‌ پيرا ته ‌نه‌هات، دێ وێرى ب تنێ ل مال بنڤى هه‌كه‌ تو نه‌وێرى وه‌ره‌ مالامه‌ بنڤه‌ ؟

ئێكێ گوتێ چاوا تو نه‌وێرى ب تنێ ل مال بنڤى بانێ تو دبێژى ئه‌ز مێره‌كى ب سه‌د مێرانم؟

- ئه‌رێ ئه‌ز مێره‌كى ب سه‌د مێرانم ، ماخوه‌ نه‌ وه‌كى هه‌وه‌ عه‌جيكم.

ئێكى دى گوتێ :ئانكو تو ژ ئه‌جنيا ناترسى هه‌كه‌ ئه‌ڤ شه‌ڤه‌ هاتنه‌ ته‌ ؟

ئێكى دى گوت: با هه‌كه‌ ئه‌زمانسۆرك و نانخواركێ دوپێ هاتنه‌  دێ چ كى؟

ده‌نگه‌كێ دى گوت: "دێ چ ل پيرهه‌ڤيا و سه‌ركرينكا كى؟"

باوه‌شكێن خه‌وێ هاتنێ، ژ نشكاڤه‌ فانوسا وى پت پتكر، پاشى ڤه‌مريا، ژبيركربوو گازێ بكتێ و نه‌وێرا ژى ژ ناڤ نڤينا ده‌ركه‌ڤيت. هه‌ست ب ترسێ كر و ته‌زيلانك ب سه‌ر له‌شى دا هاتنه‌ خوارێ. رك ورك به‌رێ وى ما ل ده‌ريكى و د ده‌رزێن ده‌ريكى داريره‌، ئه‌جنه‌ رێز بوون هند ب شاخ و هند كوچ، هند ريه درێژ و هند كوسه‌، هند ب سێ ده‌ڤاو دو دفنا، هند بێ دفن. لێدانێن دلێ وى ب له‌ز كه‌تن ،رها ستوێ وى بلند بوو ،ب كوته‌كى و ب دزى هه‌ناسا خوه‌ دئيناو دبر،جار لحێف دكێشا سه‌ر چاڤێن خوه‌ وزوو زوو سه‌رێ خوه‌ ژبن لحێفێ دئينا ده‌ر. جاره‌كێ سه‌رێ خوه‌ خويلكرو ب تيێ چاڤى به‌رێ خوه‌ دا په‌نجه‌ريكا هنداڤى سه‌رێ خوه‌.ديت هند ئه‌زمانسۆرك و نان خواركێن دوپێ يێ ل به‌ر په‌نجه‌رێ ددانێن وان يێن چيق دكن. هندى دى ترسا وى زۆر بوو ب نوزه‌ نوز گازيكر ئو دادێ... دادێ لێ هاته‌بيرێ هه‌موو ئالاڤێن گه‌هاندنێ نه‌شێن ده‌نگێ وى ب گه‌هينه‌ دادێ و چ هێز نه‌شێن دادێ ژ خه‌وا گران راكن. چاڤێن وى ژ په‌نجه‌رێ ڤه‌ بوون ،كه‌تنه‌ ده‌رزێن ده‌ريكى ديسا ئه‌جنه‌ برێز يێ خوه‌ د قه‌لێزن و دبورن ب ده‌نگه‌كى مه‌لوول گوت: وه‌ى ى ى...بابووو... هاته‌ بيرێ بابو سه‌را دايكا وى يێ ل پشت شفشان دكونجه‌كا تارى ده‌،ئه‌ڤه‌ شه‌ش سالن نه‌ديتى ژبلى روژێن جه‌ژنێ، هه‌تاسه‌رو سيمايێن وى ژى يێن ژبيركرين. ژنشكاڤه‌ ده‌نگێ سه‌يێ وان بلند بوو..خوينا وى رۆهن بوو هه‌وارا وى هات و دبن لێڤانڤه‌ گوت: دێ چاڤێ سه‌رى ڤان ئه‌جناو ئه‌زمان سۆركا ژێك بينه‌ده‌رێ و ژێك راته‌قينه‌ لێ سه‌يێ وى ژى زوو لال بوو ،به‌س بو ئه‌و ره‌وين .ترسا وى زۆرتر لێ هات . ب چالى چه‌پكا خوه‌ كێشا دبن ستێركێ نڤيناڤه‌ ، سه‌رێ خوه‌ل ستێركى دا و ژبنێ پيا كره‌ قێرى هه‌واره‌ گوندينو .. پاتكا وى گه‌رم بوو وستوێ وى شل بوو.له‌رزكێ گرت وچه‌ق چه‌قا ددانێن وى بلندبوو. كێزه‌كێ دبن ستێركى ڤه‌ پێ وى گه‌ست رومه‌كێ خوه‌ هه‌لا ڤێت و ئه‌نيا خوه‌ ژى ل ستێركى دا و ژبنێ پيا كره‌ هه‌وار هو ئازووو، نه‌هه‌رێ ئازوو ژى وه‌كى هه‌موو گونديان يێ دخه‌وه‌كا گران ده‌.ل سه‌ر ئه‌نيشكا خوه‌ ژبن ستێركى ڤه‌كێشا و ب له‌په‌قوتێ ل پاته‌كێ گه‌ريا دا سه‌رێ خوه‌ گرێدت. به‌ره‌و قولاچى چوو. هنديت پير هه‌ڤيه‌كێ خوه‌ تێوه‌ركر. پشتى قيژى و هه‌وار هه‌وارێ ساكويێ پيراخوه‌ ژ سه‌ر كه‌لواشێ خوه‌ راكر، ب فانێلێ خوه‌ حشتك سه‌رێ خوه‌ گرێداو چوو ناڤ نڤينێن خوه‌ دا و چاڤێن وى هه‌رمانه‌ زل، ل تيكێن ده‌ريكى .ئه‌جنه‌ هێژ يێ خوه‌ دقه‌لێزن ودبورن. خوه‌ متكر و ما ل هيڤيا قه‌ده‌راخوه‌. ئێدى ئاگه‌ه ژ خوه‌ نه‌ما هه‌تا رۆژ گه‌هشتيه‌ پانكا ئه‌سمانى، ده‌مه‌كێ هشياربوو ب سه‌ر خوه‌ ڤه‌ هات له‌شێ وى يێ گران بووى نڤينێن وى يێن چڤر بووين. لحێف دا پاش بێهنه‌كا نه‌خوه‌ش ژێ فرى دفنا خوه‌گرت و ده‌ستێ خوه‌ دا پاشيا خوه‌ و ده‌ركه‌ته‌ ژ ده‌رڤه‌.