بهرههم - نڤیسار
چما ئهڤ هێرشێن هۆڤانه ل سهر مالباتا بهدرخانییان؟
سپێدهیا باهیڤان
ئهو خانما ههنێ
ژ دهفتهرا سهرهلدانێ 1
ژ دهفتهرا سهرهلدانێ بهشێ 2
ژ دهفتهرا سهرهلدانێ بهشێ 3
حهسهن سلێڤانی ( ههلبهستڤان و نڤیسهر)
ژ دهفتــــــــــــــــــهرا سهرهلــــدانێ 3
(3)
ته پهنجهرا ب رهخ خوه ڤه ڤهكر, د وێ كهلا دژوار ده بايهكێ هين, ناڤچاڤێن ته ماچی كر. هێدى هێدى وه مالێن تاخا حسێنيكێ ل پشت خوه دهێلان. ريشاردى كاميرا خوه دابوو بهر چاڤێ خوه و باژێرێ زاخۆ وێنه دكر. دهمێ ترومبێل گههشتى سهرێ تاخى, نێزيكی لێڤا خابيرێ هار, ئهوى تولازێ ژ نوى مویزهرك ل ئالهكێ هاتين و ل بهر دهرگههێ كوستهرێ ژ پێ ڤه راوهستایی، گۆته شوفێرى:
- ب خێرا دهيبابێن خوه, تنێ دهقيقهكێ ل ڤێرێ راوهسته, ئهزێ تڤهنگا خوه ئينم و ئێم…!
خوه ژ ترومبێلێ ئاڤێت و ب غار قهستا مال كر, ههر دوێ گاڤێ دا, دهركهت و تڤهنگا وى ب ملی ڤه، دهيكا وى ل دويڤ گازى دكر.
- كورێ من هاژ خوه ههبه, بگههه بابێ خوه و ههر دوو برايێن خوه.
- بلا ئۆدا, بلا...
دهرگههـ گرت و گۆته زهلامان:
- ل من ببۆرن, من پچهك هوون گيرۆ كرن.
ئهو زهلامێ روى سۆرێ، ل ناڤچاڤێن وى نڤيسى كو گهلهك دونيا ديتیيه و شهركهرهك كهڤنه, د برنۆ یا خوه فوكرى و گۆته ئهوى جحێلێ خوينگهرم:
- كوردستانا مه ههر دێ سهرفهراز و ئاڤا بيت, هندى خورتێن وهكى ته ههبن...سهحهتا ته خوهش لاوو!
بهرى هوين ژ پرێ دهرباز ببن, چاڤێن ته ژ پێلێن خابورى ڤهنهدبوون, تيرۆژكێن كهلا رۆژێ ل سهر رويێ ئاڤێ ب ديناتى درهقسين, تو ل خابورى زڤری ڤه و د دلێ خوه دا بێ دهنگ گۆتێ:
- دێ زڤرم ڤه، ههر و ههر دێ ژ ئاڤا ته ڤهخوم...!
ل سهرێ گوندكى كومێن زهلامان دگههشتن ئێك و قهستا گهلى دكرن, ژكهيفا ده رۆندكێن ته دهاتن خوارێ... دهمێ وه زالگههـ ل پشت خوه هێلاى و كهڤر و دار و بارێن سهرێ باژێرێ سهرێن خوه بۆ وه دچهماندن و ب رێيا خوه يا تايبهت سلاڤ ل وه دكر "ئێكسهر تو چار سالا پاشڤه زڤريێ و ئهو پهيڤێن ل بوهارا ههشتێ و حهفتێ, ل ميسلێ بناڤێ (رێيا رۆژێ) ته نڤيسين, د دلێ ته دا خوه دهلاڤێتن, ته ژى هێدى هێدى ڤهگێرانه ڤه بۆ جوانيا سروشتێ كوردستانا بهرخودانێ:
ئهڤه ئهزێ چم سينگێ ئاگرى
مينا مێرخاسێن پر هێز و دل شێر
دا بپارێزم
ڤى وارێ دێرين
ژ دل رهشيا دوژمنێ گورى
دا زارۆكێن مه
ههر چێكن ل بهر لێڤێن خابورى
خانيكێن خيزى و
بكهنن بۆ مه و
دێمێ بهفرا سپى
يا نڤستى ل سهر چيايێ سپى
* * *
ئهڤيندارا من
سۆزبت ب جوانيا ههر دوو چاڤێن ته
ئو گرانتر نينن ژ چاڤێن ته
وهلاتێ ته نهبت
ئو روح و گيانێ من گورى گهردهنا وهلاتى بت
گهر ئهز ساخ و سهر بلند زڤريم
ب ستران و سهربهستى زڤريم
ئهزێ ژ تهره
ژداڤێن ههيڤێ
شالهكێ رێسم
ل نهوقاته يا سپينداری يا تێر من نهديتى
ب ڤان دهستێن بێهنا بارويت و جهنگێ ژێ دفرن
ب كهيف گرێدم..
ئهزێ ژ تهره
ژ تيروژێن رۆژێ
رستكه كێ چێكم
د ئاڤا گول و رحانا هلينم
ل گهردهنا ته
يا جوانى ژێ دزێتن, شدينم
دا ههر بمينى
خانما ئهڤينێ و
رهوشا ڤێ ژينێ…
* * *
بهلێ پا ئهگهر ئاخا وارێ من
خهريب بو ژمن
گازى من كر و من
خوه تێوهر كر و
تێر بێن كرێ و ژ دل ماچيكر
ب خوينا خوه, ناڤێ خوه نڤيسى:
زێرهڤانم ئهز
كورێ كوردانم
نهڤيێ مێرانم
خورتێ چيانم
ئو رحا من ل سهر چهنگێن كهڤوكا
سپى كهڤۆكا
ب كهيف و خوهشى
ب لاڤژه و شاهى
بۆ ئهسمانێ جيهانا دى فرى
تهرمێ من دناڤ خوينێدا تهيسى
قهد خهما نهخوه
نێ سبه سحارێ
دێ رحا من دگهل چاڤێ رۆژێ
بهلاڤ بت,مينا رونههيا رۆژێ
دێ ب ئهزمان كهڤت و ئاخفت
ههيڤا شهڤێ
ئهزمانهكێ سپى مينا نورهێ
ودێ بێژته ته و
ههڤالێن گوندى و
هوگرێن چياى و چهك و شهرى
ب دهنگهكێ, نه وهك وى چ دهنگ
ئهز ساخم , نامرم
كهوهكێ شادم و
ل دورێن كوپتَێن وارێ خوه ههرو
ههر دێ قهبم و قهبم
دێ فرم و نامرم…
پرتووک
1.
گولستان و شهڤ " رۆمان"
2. قصص من بلاد النرجس " چیرۆک" ب زمانێ عهرهبی
