بهرههم - نڤیسار
چما ئهڤ هێرشێن هۆڤانه ل سهر مالباتا بهدرخانییان؟
سپێدهیا باهیڤان
ئهو خانما ههنێ
ژ دهفتهرا سهرهلدانێ 1
حهسهن سلێڤانی ( ههلبهستڤان و نڤیسهر)
ژ دهفتــــــــــــــــــهرا سهرهلــــدانێ
(1)
ته مايكروفۆن دهينا بوو, بێى حهمدێ خوه, چاڤێن خوه نقاندن و ڤهكرن, ته سهرێ خوه بلندكر و گۆته بهيارى:
تشتێ ژ ڤێ فهرتر ههيه .
ب وى دێمێ پر پرسيارێن خهمگين, د ته فوكرى و گۆته ته :
چ رێکێن دى نهمان.
ب خاترا ته.
ئهزێ د دويڤ ته ده ئێم.
دهمێ ته ئوده ل پشت خوه هێلاى و گههشتى حهوشا مهكتهبا بهدرخان, ئهوا بوویی بارهگايێ سهرهكى, ته ههست كر, بهلگێن دارێن مهكتهبێ ژى پر ئێش و کۆڤانن, نه وهك بهرى چهند رۆژانن ته بهرێ خوه دا وان مروڤێن بێ رهنگ و رووى,چاڤ ترسياى و مهندههوش، ئاگرهكێ جههنهمى د دلێ ته ده دكهلى و جهرگ وهناڤێن ته دسۆتن، تو ل دۆر خوه زڤرى و ل ديوارێن مهكتهبێ فوكرى و ب كهرب ژێ دهركهتى.
ئهو بارهگايێن بهرى سهعهتهكێ ب تنێ, پر دهنگ و رهنگ و چهك و فيشهك و ستران و مێرخاس مت و بێ دهنگ بوون, خهلكێ باژێرێ زاخو و يێن لێ بووين مێهڤان, وهك بهرێ, پچهك ڤه نهدگهران , هندهك ژ وانا مينا پهيكهرێن كهڤران ل بهر ديوارێن دوكانان راوستایى بوون.
ته بۆ خوه گوت :"پا كا هوين, خودانێن دهمانجه و تڤهنگ و رهخت و فيشهكان ؟ كا هوين خودانێن ئهزمانێن سێ گهز و نيڤان؟ كاهوين تاژيكێن كولانان ؟!
ب كهرب و كين , ته رێکا مالا خهزوورێ خوه گرت، تو ب خوه ژى نزانى چهوا وهسا زوى گههشتى مالێ دهمێ ته دایى د ژۆر ڤه, دلويێ دوو سالى , قهستا تهكر، قيركر :
بابۆ هات…بابۆ هات!
هێدى هێدى, داڤێن كهربێ , ناڤچاڤێن ته بهردان، ب دلهكێ سۆتى, ته گوته خوه : "چ گوننهها ڤى زاروکی یه بێته كوشتن؟ يان ژ ئيرو پێڤه ئێدى بابێ خوه نهبينيت؟".
ته زارۆكێ خوه ژئهردى راكر و كره ملێ خوه و تێر ماچی كر , هندى ژ وى هات خوه ب سينگێ ته ڤه نويساند و شداند. جارهكا دى ته ماچی كر و ته بره د ئودێ ده و دهينا خوارێ بهرى دهيكا وى بئاخڤيت، ته گۆتێ : "تڤهنگ و رهختێ من بينه دهر" .
ئێكسهر, ئهورێن تارى راهێلان دێمێ وێ يێ سپى .
سهر و سيمايێ وێ هاته گوهۆرين, پرسيارێن مرى ل سهر لێڤێن پێتى درهقسين، پهيڤ د گهورییێ ده بوون گێسنێن ئاسنى، ب ههر دو چاڤێن کو تو باش لێ شههرهزا، گوته ته:
خهلكێ دبێژت عهسكهرێ گههشتى سێمێلێ و يێ قهستا بێخێرى دكت, ئهڤ گۆتنه راسته گهلۆ؟
- ئا, راسته. نۆكه يێ خوه لێك ددت بۆ دهشتا دوبانێ و گهليێ زاخۆ.
- پا كا كوردێن مه؟ كا چهپهرێن مه؟
- نه ترسه, بێن خوه ئاماده دكن بۆ بهرگرييێ و نۆكه گهلى تژى مێرن و خهلكێ قهستا وێرێ دكن.
- حهق ئهو بوو ژ سهرێ سهرهلدانێ, گهلى و سێمێل و دهوك ب خودان بان، هزرا ڤێ رۆژا رهش كربان,نه وهك نۆكه, تێك شێلاى بان.
- چ خهمان نهخوه,گهلى ئاسێ يه و ب خودانه.
- ما مه چ دى دڤێت, خودێ پشتا وان بشكێنت ئينشهللاه.
قهستا قازانا ساڤارى كر و سێنيهك بۆ ته تێكر و د گهل نانهكا رهشاندى دهينا بهر ته و بهرانبهرى ته روينشت. ته باش بهرێ خوه دايێ… بهرێ خوه دا ته, هێدى هێدى داڤێن خهما, ناڤچاڤێن وێ دبهردان و درهڤين, جارهكا دى كوليلك و بهيبوونا مالا خوه لێ دهينان, ب نازكى گۆته ته:
ته چی یه, هوسا بهرێ خوه ددى من؟
من تو دڤێى!
ئهز دزانم.
من گهلهك تو دڤێى.
ههچهكو تو دێ مرى؟
ئهز باوهر ناكهم, هێژ زوی يه.
دێ زادى بخوه.
ته نههـ - دههـ كهڤچكێن زادى خوارن, نيڤ پهرداغا ئاڤێ ب سهردهكر .
ته پانتولێ كابوى ئێخست, ئهو شهلوالێ ته ژ مالتايێ دگهل خوه ئيناى, كره بهر خوه، رهختێ لهشكهرى ل سهر شداند، دهرسۆكا بهلهكا بێ سهر و بهر د ستوويێ خوه ئالاند... زێرويێ حهفت سالى بشكورى و گۆت : "وهى وهى بابویى... چ خوه كر پێشمهرگه!".
دهمێ ته دهست ئاڤێتى دارێ تڤهنگێ خهسوويا ته ب كۆتهكى شيا بێژته ته:
دێ چ كى, بهختێ خودێ؟
ته تڤهنگ كره ملێ خوه و گۆتێ:
دێ چم گهلى!
گهليێ چى و شهرێ چى؟ روينه خوارێ, ته چ ژێ يه؟
ئا... روينم خوارێ و سهرێ خوه شور بكم و چاڤێن خوه حولی بكم, ههتا بهێن و جارهكا دى ل مه سوار ببن,ما نه؟
ئێ ,تو دێ چیه چی؟
ههگهر ئهز و كورێن ته و خورتێن ڤى باژێرى خوه ل بهر دوژمنى نهگرين ما ئهم بۆ چ نه؟
ئێ...ئێ...!
بهس درێژ بكه. دێ چم ، ئانكو دێ چم! گوهێ ته ل بچوكان بيت.
بهرى تو دهركهڤى, زێرۆیی گوته ته:
بابۆ ئهز ژى دێ هێم!
دێ هێى چى بابۆ خولام؟
دا هارى ته بكم.
دێ چهوا هارى من كى؟
ئهزێ فيشهكا بۆ ته داگرم ،ب خودێ ئهز دزانم .
هێژ زوی يه بۆ ته كورێ من, ئهز دزانم تو زيرهكى خوه بگره بابۆ، دێ رۆژا ته ژى هێت.
تو گهلهك دلشاد بوویى ب ئاخڤتنا زێرۆیی، گرنژينهك ساڤا ل سهر لێڤێن دهيكا وى پهيدا بوو, بهرى تو دهركهڤى دهرڤه, گۆته ته:
بهختێ خودێ, هشيارى خوه به, خوه بپارێزه، تو لێ زڤری و بئهزمانێ چاڤا ته گوتێ:
بلا…بلا.
دهمێ ته دۆ - سێ پێنگاڤ ئاڤێتين, دهنگێ خهسويا ته گههشته گوهێن ته.
وهغهرا ته ياخێرێ بيت كورێ من …!
پرتووک
1.
گولستان و شهڤ " رۆمان"
2. قصص من بلاد النرجس " چیرۆک" ب زمانێ عهرهبی
